Qanat Islam jekpe-jekke daıyndyqty Fıladelfııada jalǵastyrýda
ASTANA. QazAqparat - Qanat Islam aldaǵy jekpe-jegine daıyndyq jumystaryn jalǵastyrý úshin Fıladelfııaǵa bardy, dep habarlaıdy QazAqparat tilshisi.
Bul týraly Islamnyń aqparattyq kómekshisi Berik Sultan Feısbýktegi paraqshasynda jazdy.
«Fıladelfııada qazir qys. Jekpe-jekke deıin aýa raıyna úırený úshin jáne daıyndyqty kúsheıtý úshin Qanat Islam Fıladelfııaǵa keldi. Munda birinshi jattyǵý jumystaryn ótkizip te úlgerdi. Salmaq ta, kóńil kúı de jaqsy! «Qazaqstan» ulttyq arnasy men «KAZSport» arnalarynan 18 aqpan, tańǵy saǵat 08:00-de tikeleı efırde júzdesemiz! Jaqsy pikirlerińiz ben tilekterińizdi oqyp, qýanyp otyramyz! Erim deıtin el barda, elim deıtin erler kóbeıedi. Jeńisti kúnde jolyǵaıyq», - dep jazylǵan jeke paraqshada.
Aldaǵy ótetin kezdesýine otandasymyz buǵan deıin Maıamı qalasynda daıyndalyp júrgen edi.
Esterińizge sala keteıik, 17 aqpan kúni 32 jastaǵy qazaqstandyq boksshy Qanat Islam (22-0-0, 18 KO) brazılııalyq boksshy Robson Assıpen (16-3-0, 9 KO) judyryqtasady.
