Qanat Islam jankúıerlerine qoltańbasy bar boks qolǵaptaryn úlestirdi
Qanattyń ashyq jattyǵýyn tamashalaýǵa kelgen sport súıer qaýym qatary kóp boldy, «Qanat chempıon!» degen jankúıerler aıqaıy qarapaıym adamdardyń da nazaryn aýdartty.
«Bul maǵan úlken qoldaý!», - degen Qanat Islam qarsylasynyń ońaı emes ekenin taǵy da aıtty.
«AQSh-tan jattyqtyrýshym kelip, sońǵy bir aıdaǵy daıyndyǵym sapaly boldy. Tastúıin daıynbyz. Jankúıerdiń búgingi qoldaýy bul maǵan úlken demeý. Bıyl elimizdiń Táýelsizdigine 25 jyl. Almaty qalasynyń 1 000 jyldyǵy. Osy uly toıda jaýapkershilik eseleı túsetindeı. Qarsylasty jattyqtyrýshymen kúnde qarap otyrmyz. Rekordy menen joǵary, 28 nokaýty bar. Soqqylary joıqyn. Óte saq bolý kerek. Sondyqtan jan-jaqty daıyndalyp jatyrmyz. Qarsylasym deńgeıine qaraı shetelden de sportshylar ákelip daıyndyq jasap jatyrmyz», - dedi Qanat Islam.
Sóz sońynda Qanat Islam 29 qazanda ótetin jekpe-jegin kórýge jáne ózge de qazaq sportshylarynyń saıysyn tamashalaýǵa shaqyrdy.
Aıta keteıik, 29 qazan kúni «Almaty arena» sport saraıynda, kásipqoı boksshy Qanat Islam «WBA Fedelatin» belbeýin qorǵaý jáne qurlyqaralyq WBO chempıondyq belbeýi úshin ganalyq boksshy Patrık Alloteımen jekpe-jekke shyǵady.
Búgin jekpe-jek qarsańynda Qanat Islam búgin Almatydaǵy «Mega» saýda ortalyǵynda kópshilik aldynda jattyǵý ótkizdi.
29 qazanda jankúıerler jas sportshy, Rıo Olımpıadasynyń qatysýshysy, Álem chempıony Jánibek Álimhanulynyń da kásipqoı bokstaǵy alǵashqy jekpe-jegin kóredi. Jánibek alǵashqy kezdesýin kolýmbııalyk Mılton Nýnespen ótkizedi.
Sonymen qatar, «Almaty arena» muz saraıynda ótetin bul aıtýly boks keshinde elimizdiń kásipqoı boksshylary: Janqosh Turarov, Rýslan Myrsataev, Álı Ahmetov, Aıdar Sháripbaev, Aıdos Erbosynuly syndy bylǵary qolǵap sheberleri sheteldik kásipqoı sportshylarmen qolǵap túıistiredi.