Qanat Islam jańa qyzmetke taǵaıyndaldy
ASTANA. KAZINFORM — Belgili boksshy Qanat Islam Dúnıejúzi qazaqtary qaýymdastyǵy tóraǵasynyń birinshi orynbasarynyń keńesshisi qyzmetine taǵaıyndaldy.
Bul týraly qaýymdastyq tóraǵasynyń birinshi orynbasary Zaýytbek Turysbekov Býrabaıda ótip jatqan sheteldegi qazaq balalaryna arnalǵan «Atameken» halyqaralyq balalar quryltaıynda málimdedi.
— Shetelde týyp-ósken qazaqtyń qas batyry, álemdik rıngte el namysyn qorǵaǵan Qanat Islamdy jurtshylyq jaqsy tanıdy. Ol — sporttaǵy jetistigimen qatar, ult múddesine janashyr azamat. Quryltaıǵa qatysyp otyrǵan jas urpaqtyń arasynan Qanattaı elge qyzmet etetin azamattar ósip shyqsyn degen nıetpen ony qaýymdastyq jumysyna shaqyryp otyrmyz. Aldaǵy ýaqytta onyń el ıgiligi úshin atqaratyn jumystary kóp bolady dep senemiz, — dedi Zaýytbek Turysbekov.
Óz kezeginde Qanat Islam bul qoǵamdyq qyzmetke úlken jaýapkershilikpen kelgenin aıtty.
— Dúnıejúzi qazaqtary qaýymdastyǵy — álemdegi qazaqtardy uıystyratyn qarashańyraq. Qazaqta «Er jigitti jas ósirmeıdi, jaýapkershilik ósiredi» degen sóz bar. Biz de moınymyzǵa úlken jaýapkershilik alyp otyrmyz. Bul uıymǵa talaı el aǵalary eńbek sińirip, dúnıejúzindegi qazaqtardy biriktirý jolynda aıanbaı qyzmet etti. Sol ıgi isti jalǵastyryp, jańa mazmunmen damytý — bizdiń mindetimiz. Elge kelgen qandastarǵa durys baǵyt-baǵdar berý, bereke-birlikke shaqyrý, el ıgiligi úshin qyzmet etýge jumyldyrý — bizdiń jaýapkershiligimiz. Basty maqsatymyz — qazaq eliniń abyroıyn asqaqtatý jáne el birligin nyǵaıtý, — dedi Qanat Islam.
Aıta keteıik, bıylǵy quryltaıǵa Mońǵolııadan — 70, Qytaıdan — 60, Ózbekstannan — 50, Reseıden — 45, Qyrǵyzstannan — 35, Túrikmenstannan — 15, Túrkııadan — 4, Aýǵanstan men Irannan úsh-úshten, Tájikstannan — 2 jáne Eýropa elderinen 1 bala qatysyp otyr. Jalpy qatysýshylar sany — 288.
Uıymdastyrýshylardyń aıtýynsha, «Atameken» halyqaralyq balalar quryltaıy sheteldegi qazaq balalarynyń ulttyq biregeıligin saqtaýǵa, olardyń Qazaqstanmen rýhanı baılanysyn nyǵaıtýǵa jáne álem qazaqtarynyń tutastyǵyn kúsheıtýge baǵyttalǵan mańyzdy halyqaralyq joba bolyp qala beredi.
Eske sala keteıik, buǵan deıin Býrabaıdaǵy «Baldáýren» respýblıkalyq oqý-saýyqtyrý ortalyǵynda «Atameken» halyqaralyq balalar quryltaıynyń bastalǵany habarlanǵan bolatyn.
