Qanat Islam syn aıtýshylarǵa jaýap berdi
ASTANA. QazAqparat - Búgin Astanada ótken baspasóz máslıhatynda birinshi orta salmaqtaǵy WBO Intercontinental men WBA Fedelation belbeýleriniń ıegeri Qanat Islam jankúıerleriniń tarapynan aıtylatyn syndarǵa jaýap berdi, dep habarlaıdy QazAqparat tilshisi.
«Syn túzelmeı, min túzelmeıdi» deıdi atam qazaq. Negizi, ózimiz synshyl halyqpyz ǵoı. Syn aıtqan adamdarǵa kóp raqmet! Árıne, myqtyny jeńe almasań, myqty sportshy bola almaısyń. Biraq men árbir qarsylasymdy ózimnen tómen, ózimnen álsiz dep baǵalamaımyn. Sosyn tyńdaıtyn syn jáne tyńdamaıtyn syn bar ǵoı. Seniń kásibińe, ıa bolmasa, bapkerine qatysty syn aıtylsa, onymen kelisýge, kelispeýge bolady. Kez kelgen salada syn aıtylady. Men ózim syndy durys qabyldaımyn. Óıtkeni, árbir jekpe-jekten keıin osal tustarymdy ózgertýge tyrysamyn», - deıdi Qanat Islam.
Boksshynyń aıtýynsha, árbir qarsylasty kásibı bokstyń shyńyna aparatyn baspaldaq retinde qarastyrý qajet. «Maǵan salsa, erteń-aq kez kelgen chempıonmen shyǵýǵa daıynmyn. Biraq oǵan qarsy shyǵý úshin olardyń bergen qarsylastarynan ótý kerek. Sol sebepti aldaǵy ýaqytta myqty qarsylastar bolady. Soǵan taıap qaldyq. Qazirgi kezde men WBO, WBA men IBF boıynsha álemdik úshtikte-tórtikte turmyn. Sondyqtan chempıondyq ataq ta alys emes. Alla buıyrsa, myqty qarsylastarmen kezdesemin. Árıne, ol úshin eńbekqorlyq ta, sabyr qajet», - dep atap kórsetti boksshy.
Aıta keteıik, Qanat Islam - WBO Intercontinental men WBA Fedelation belbeýleriniń ıegeri. Qazaqstandyq boksshy Astanadaǵy EKSPO-2017 kórmesi aıasynda 9 qyrkúıekte kezekti jekpe-jegin ótkizýdi josparlap otyr. Onyń kelesi qarsylasy - AQSh boksshysy Djeıms Kırklend . Aldaǵy ýaqytta qazaqstandyq boksshy Gennadıı Golovkınmen jumys istep jatqan NVO arnasymen kelisimshartqa otyrýy ábden múmkin.
