Qanat Islam «Qazaq promoutions» kompanııasynyń bolashaǵy týraly aıtty

ALMATY. QazAqparat - Tanymal kásipqoı boksshy, «Qazaq promoutions» kompanııasynyń negizin qalaýshy Qanat Islam Astanada ótken boks keshiniń nátıjeleri týraly aıtty, dep habarlaıdy QazAqparat tilshisi.

«Jalpy alǵanda boks keshi óte jaqsy ótti. Bizdiń boksshylardyń qarsylastary shetinen myqty boldy. Eń bastysy jankúıerlerdiń kóńiliniń kiltin taba bildik. Olardy aldaý múmkin emes. Rýslan Myrsataev, Ashat Ýálıhanov, Aıdar Sháribaev pen Abylaıhan Qusaıynov sııaqty sportshylarymyz tıimdi taktıkasynyń arqasynda aldyńǵy qatarǵa shyǵa bildi. Ókinishke oraı, ázerbaıjandyq Farıd Álıevtiń bas tartýynyń kesirinen Elshat Nyǵmatýllauly WBC belbeýi úshin Mardan Berikbaevpen qolǵap túıistirdi», - dedi Qanat Islam.

Sondaı-aq, Qanat Islam boks keshterin jıi ótkizýdi josparlap otyrǵanyn  da aıtty.

«Biz qazaqstandyq boksshylarǵa qatysty úlken jospar quryp otyrmyz. Árbir boks keshi arqyly boksshylardyń sheberligin shyńdap, álemdik arenalarǵa daıyndaıtyn bolamyz», - dedi Qanat Islam.