Qanat Islam: «QAZAQ promotions» esigi barlyq qazaq boksshylaryna ashyq

ASTANA.QazAqparat - «QAZAQ promotions» qazaq boksshylarynyń kásipqoı boksta jetistikke jetýine kómektesedi. Bul týraly promoýterlik kompanııasynyń negizin qalaýshy, tanymal kásipqoı boksshysy Qanat Islam Astana qalasynda ótken baspasóz máslıhatynda aıtty, dep habarlaıdy QazAqparat tilshisi.

Qanat Islam promoýterlik kompanııanyń aldaǵy josparlarymen bólisti.

«Promoýterlik kompanııany AQSh-ta júrgen kezimde qurdym. Basty maqsatymyz - qazaq kásipqoı boksyn damytý. Elimizde talantty boksshylar kóp, alaıda barlyǵy ulttyq qurama qataryna kirip, olımpıadaǵa qatysýǵa múmkindik ala bermeıdi. Al kelesi Olımpıadaǵa qatysýǵa úshin taǵy qanshama jyldaryn ótkizip alady. Sondyqtan, biz osy sportshylardyń kásipqoı boksta jetistikke jetýine kómektessek dep oılaımyz. Ázirge naqty eshkimmen kelisimshart jasasqan joqpyz. Alaıda, biz barlyq qazaq boksshylaryna qoldaý kórsetemiz», - dedi Qanat. 

Aıta keteıik, 16 jeltoqsan kúni Astana qalasyndaǵy  «Dáýlet» sport saraıynda kásipqoı boks keshi ótedi. Boks keshinde Aıdar Sharybaev, Elshat Nyǵymetollauly, Ashat Ýalıhanov, Abylaıhan Qusaıynov jáne Rýslan Myrsataev sharshy alańǵa shyǵady.