Qanat Islam Olımpıadaǵa baryp qalýy yqtımal
ASTANA. 13 jeltoqsan. QazAqparat - Beıjiń Olımpıadasynyń qola júldegeri, kásipqoı boksshy Qanat Islam olımpıada sharshy alańynda bokstasýy múmkin, dep habarlaıdy Vesti.kz.
«Biz jaqynda ǵana onymen birge sóılestik. Ol kásipqoı boksta baǵyn synap júr. Biraq óziniń jarqyn jeńisterine qaramastan, áli kóp tanyla qoımaǵan. Men oǵan «Astana» prezıdenttik kásibı sport klýbymen áriptestik ornatýǵa, Astana Arlans qataryna qaıta qosylýǵa shaqyrdym. Bolashaqta Q.Islam kásipqoılar men áýesqoılardyń aralas APB jobasyna kelýi yqtımal. Sol arqyly ol Olımpıada joldamasyn alýy bek múmkin. Eger kelisimin berse, biz onymen dereý kelisimshartqa qol qoıamyz. Oǵan birinshi dıvızıonnyń boksshysyna laıyq jalaqy men áleýmettik paketter taǵaıyndaımyz», - dedi «Astana» prezıdentik klýbynyń basshysy Baqtııar Artaev.
«Men úshin Qanat - óte jaqyn adam. Biz buryn onyń Qytaı quramasy sapynda júrgende birge bokstasqanbyz. Men ony syılaımyn. Qazaqstan jankúıerleri onyń qandaı jetistikke jetkenin, sharshy alańda qalaı ózin kórsetip júrgenin kórip, baqylap otyr. Ol ózine óte úlken maqsattar qoıdy. Men oǵan onyń oryndalýyna kómekteskim keledi. Onyń basty kózdegeni - Olımpıada oıyndary, 2016 jylǵy Brazılııanyń altyny. Árıne, Qazaqstan quramasynda jaqynda Álem chempıony atanǵan Jánibek Álimhanuly bar. Osyndaı boksshylardyń arasyndaǵy básekelestik Qazaqstan quramasy úshin paıdaly», - dep atap ótti B.Artaev.
Aıta keteıik, Qanat Islam áýesqoı bokstan 2012 jyly qyrkúıekte ketken bolatyn. Sodan beri Qanat 15 kezdesý ótkizip, onyń barlyǵynda jeńiske jetti, 13 jekpe-jek nokaýtpen aıaqtalǵan. Sońǵy kezdesýde Q.Islam kolýmbııalyq boksshy Emılıo Hýlıo Hýlıoǵa eshbir múmkindik bermeı, 3-raýndta qarsylasyn rıngke sulatyp tastady. Keleside qazaqstandyq boksshy sharshy alańǵa 14 jeltoqsanda shyǵady.
