Qanat Islam múgedek balaǵa qolǵap syılap, aldaǵy ótetin aıqasyna bılet berdi
ASTANA. QazAqparat - Kásipqoı boksshy Qanat Islam múgedek balaǵa bylǵary qolǵabyn syılap, aldaǵy ótetin aıqasyna bılet berdi, dep habarlaıdy QazAqparat tilshisi.
Bul týraly Qanat Islamnyń PR menedjeri Berik Sultan Feısbýktegi paraqshasynda jarııalap, vıdeo júktedi.
Vıdeoda Qanat múgedek balaǵa bylǵary qolǵap syılap, aldaǵy ótetin jarysyna kirýge bılet berip jatqanyn kórýge bolady. Sondaı-aq, balalarǵa bokstyń qyr-syryn úıretip, rıng syrtynda da jeńiske jetýdiń joldaryn túsindirip jatyr.
Al Berik Sultan bolǵan oqıǵa týraly bylaı jazdy.
«Bizdiń maqsat - tek rıngtegi qarsylasty jeńý emes, bizdiń maqsat - qıyn jaǵdaıǵa ushyraǵan jandardyń qaıǵysyn jeńýge de kómektesý. Júzderine kúlki syılap, ómir súrýge qulshyndyrý! Bul - adamdyq boryshymyz. Bul -QAZAQ komandasynyń maqsaty. Jaqynda ǵana meniń ýatsabyma belgisiz nómirden qatarynan birneshe vıdeo kelip tústi. Ashyp qarasam DTsP men aýratyn balanyń vıdeosy. Anyqtap tyńdasam Qanat Islamǵa sálem joldap, «sizdiń jekpe-jekterińizdi úzbeı kóremin, siz sııaqty bolǵym keledi» deıdi. Qolynda qolǵaby bar. Júregim eljirep ketti. Áreń qımyldap, jattyǵý jasap jatyr. Vıdeony birden Qanat aǵaǵa kórsettim. Ol: «Kettik, Berik», -dedi».
Aıta keterligi, Amır «BI Juldyzaı» ońaldyrý ortalyǵynda emdeledi.
