Qanat Islam men Rýslan Myrsataev qarsylastaryn nokaýtqa jiberdi
ASTANA. 11 sáýir. QazAqparat - Ótken senbide elordadaǵy «Dáýlet» sport kesheninde Búkilálemdik boks serııasynyń jartylaı fınaly aıasynda «Astana arlandary» men AQSh-tyń «Los Angeles matadors» komandasynyń sportshylary qolǵap túıistirdi.
Kesh shymyldyǵyn ashqan 54 kelidegi Mırjan Raqymjanov pen WSB reıtıngisinde tórtinshi orynǵa jaıǵasqan AQSh-tyń úzdik boksshylarynyń biri Raýshe Varren arasyndaǵy kezdesý óte tartysty ótti. 4 raýnd esebi boıynsha eki bylǵary qolǵap sheberiniń de tóreshiler qoıǵan upaı sany teń bolatyn. Endigi úmit 5 raýndta edi. Alaıda sońǵy kezeńde shıraq qımyldap, basymdyq tanyta almaǵan Mırjan utylýǵa májbir boldy. Bir aıta keterligi, bul sportshylar osydan tórt jarym jyl buryn Bakýde ótken baıraqty másekelerdiń birinde qolǵap túıistirgen-di. Sol joly da bizdiń boksshy amerıkalyqqa 23:13 esebimen ese jibergen edi.
Kelesi kezekte 64 sharshy alańǵa bettegen Mereı Aqshalov brazılııalyq legıoner Everton Lopesti 5 raýnd boıy basymdyqpen tize búktirdi. Osydan keıin sport keshenine jınalǵan boks jankúıerleriniń asyǵa kútken jekpe-jegin ótkizýge Qanat Islam bet aldy. WSB reıtıngisinde 5-shi oryndaǵy amerıkandyq Rýssel Lamýr bizdiń boksshyǵa qaraǵandy eńseli, ári myǵyp kóringenimen alǵashqy raýndta-aq Qanattyń aýyr soqqysynan nokdaýn aldy. Al ekinshi raýndta nokaýt alǵan amerıkandyq aıaǵynan ázer turǵanyna qaramastan tóreshiniń boksty toqtatýǵa qabyldaǵan sheshimine narazylyq tanytyp baqty. Degenmen sportshysynyń sharshy alańdaǵy jaǵdaıyn kórip turǵan jattyqtyrýshy ony sabyrǵa shaqyrdy. Osylaısha Qanat Islam Búkilálemdik boks serııasyndaǵy kezdesýleriniń 3-eýin nokaýtpen aıaqtap otyr.
85 keli salmaq dárejesinde óner kórsetetin «Astana arlandary» sapyndaǵy ózbekstandyq legıoner Ramjon Mahmýdov ýkraındyq Vıacheslav Shabranskııdi aıqyn basymdyqpen utty. Asa aýyr salmaqta Rýslan Myrsataev pen WSB reıtıngisinde 3-shi oryndaǵy amerıkandyq Davıd Imoesırı arasyndaǵy kezdesý de tartysty ótti. Buǵan deıin Búkilálemdik boks serııasy aıasynda 6 kezdesý ótkizip, onyń 5-eýinde jeńiske jetken amerıkandyq 2 raýnda Rýslannyń aýyr soqqysynan eseńgirep, tóreshi esep ashty. Dál osy jaǵdaı tórtinshi raýnda taǵy da qaıtalandy. Bul joly sol jaq shyqshyttan alǵan aýyr soqqydan amerıkandyq es jııa almady. Aıta keteıik, Rýslan Myrsataev ta Búkilálemdik boks serııasyndaǵy kezdesýleriniń 3-eýin nokaýtpen jeńdi.
