Qanat Islam: Men qarsylastaryma ózimniń daıyn ekenimdi kórsettim
ASTANA. QazAqparat - Birinshi orta salmaqtaǵy WBO NABO jáne Inter-Continental, WBA Fedelatin jáne Inter-Continental tıtýlynyń ıegeri Qanat Islam búgin Astanada ótken baspasóz máslıhatynda aldaǵy úlken jekpe-jekterge daıyn ekendigin jetkizdi, dep habarlaıdy QazAqparat.
Sońǵy jekpe-jekte 12 raýnd boıy nege otyryp dem almaǵany týraly aıta ketti. «Bul jekpe-jekte meniń daıyn ekenimdi barlyq qarsylastarym kórdi. Boksta 12 raýndqa daıyn adam kez kelgen qarsylaspen shyǵa alady. Keıbir boksshylar aýyr soqqydan emes, sharshaǵandyqtan qulap qalyp jatady. Al men sharshamasam nege otyryp dem alýym kerek? Bul bir jaǵynan meniń jattyqtyrýshylarymnyń taktıkasy, endi bir jaǵynan rıngtegi qarsylasym jáne basqa qarsylastarymnyń júrekterine úreı salý, ózimniń daıyn ekenimdi kórsetý»,- dep túsindirdi Qanat.
Aıta keteıik, Qazaqstandyq boksshy Astanadaǵy EKSPO-2017 kórmesi aıasynda 9 qyrkúıekte kezekti jekpe-jegin ótkizýdi josparlap otyr. Onyń kelesi qarsylasy - AQSh boksshysy Djeıms Kırklend bolýy múmkin.
Eske sala keteıik, Qanat Islam 27 mamyr kúni AQSh-tyń Florıda qalasynda ótken kezekti jekpe-jeginde Norberto Gonsalespen 12 raýnd boıy judyryqtasyp, upaı sanymen jeńiske jetti. Otandasymyz 12 raýnd boıy aralyq úziliste otyryp dem almaı, aldaǵy úlken jekpe-jekke daıyn ekenin kórsetti.
