Qanat Islam men Djeıms Kırklend kezdesýin «Qazaqstan» men «Kazsport» telearnalary kórsetedi
ASTANA. QazAqparat - Kəsipqoı rıngte jeńilip kórmegen, WBA intercontinental, WBO NABA chempıondyq belbeýiniń ıegeri - Qanat Islamnyń amerıkandyq boksshy Djeıms Kırklendpen jekpe-jegi aǵymdaǵy jyldyń 9- qyrkúıeginde elimizde ótip jatqan «EKSPO-2017» halyqaralyq mamandandyrylǵan kórmesi aıasynda Astana qalasynyń Respýblıkalyq «Saryarqa» velotreginiń kesheninde ótetin boldy.
Qanat Islam - kásipqoı boksshy, jeńil salmaq boıynsha Karıb aımaǵynyń úzdigi, WBA FEDELATIN tujyrymynyń chempıony, WBO INTERCONTINENTAL tujyrymynyń chempıony, qazaqtyń maqtanyshy. Ol óziniń áýesqoı bokspen aınalysýyn Qytaı Halyq Respýblıkasy Ulttyq qurama komandasynyń quramynda júrip bastaǵan bolatyn. Al 2010 jyly ol óziniń azamattyǵyn aýystyryp, týǵan atamekeni Qazaqstanǵa kóship keldi. Qazaq jerine kelgennen keıin, ol Búkilálemdik Boks serııasy sheńberinde óner kórsetetin Qazaqstan boks klýby «Astana Arlandary» kásibı klýbynyń múshesi boldy. Qanat Islam «Astana Arlandarynda» 2012 jylǵa deıin óner kórsetti. Qazir kásipqoı boksshy, «Nelson» promoýterlik klýby atynan sharshy alańǵa shyǵyp, 23 jekpe-jek ótkizip, barlyǵynda jeńiske jetti. 19 jekpe-jekte qarsylastaryn nokaýtpen utqan. Laqap aty - Qazaq.
Aıta ketý kerek, byltyrǵy jyldan bastap, «Qazaqstan» men «Kazsport» telearnalary qazaqtyń maqtanyshy Qanat Islamnyń jekpe-jekterin tikeleı efırde úzbeı kórsetip kele jatqany belgili. Sondaı-aq, bul úrdis telearnalardaǵy ózindik dástúrge aınaldy desek te bolady. Boks súıer qaýym úshin ǵana emes, jalpy Qanat Islamnyń jankúıerleri úshin de bundaı kórsetilim - keremet múmkindik.
Esterińizge sala keteıik, 27 mamyrda bizdiń otandasymyz birinshi orta salmaqta WBO NABA jáne WBA Intercontinental tıtýly úshin meksıkalyq Norberto Gonsalesti jeńgen bolatyn. Aıta ketý kerek, óz kezeginde Norberto Gonsales sol kúnge deıin 31 kezdesý ótkizip, 23-inde jeńiske jetken bolatyn. Onyń ishinde 13 jekpe-jegin nokaýtpen jeńip, 8 kezdesýinde jeńilis tapqan. Norberto Gonsalestiń laqap aty - Ázázil! Ol óz salmaǵy boıynsha meksıkalyq boksshylardyń úzdik tórttigine kiredi.
Bul boks keshine ózge qazaqstandyq boksshy Janqosh Turarov ta qatysqan edi. Onyń qarsylasy - meksıkalyq Gýstavo Garıbaı boldy. Jekpe-jek AQSh-tyń Florıda shtaty Boka-Raton qalasyndaǵy «Boca raton resort & club»-ta ótken edi. Atalmysh aıqas barysynda Qanat Islam meksıkalyq Norberto Gonsalesti jeńip, eki birdeı chempıondyq tıtýl jeńip alǵan bolatyn. Bul jeńisinen keıin Islam BoxRec portalynyń reıtınginde birinshi orta salmaqtaǵy boksshylardyń arasynda 27 satyǵa joǵarylap, 26 orynǵa jaıǵasty.
Orta salmaqtaǵy WBO NABO jáne WBA Inter-Continental tujyrymdary boıynsha álemniń jańa chempıony Qanat Islamnyń amerıkalyq Djeıms Kırklendpen kezdesýiniń negizgi jaǵymdy tustary týraly aıtqan bolatyn.
Onyń pikirinshe, bul jekpe-jek Qanat Islamǵa amerıkalyq boks týraly jazatyn BAQ pen amerıkalyq boks súıer qaýymnyń arasynda tanymal bolýǵa jaqsy áser etedi. Sondaı-aq, Qanat Islamnyń amerıkalyq jankúıerleri paıda bolady.
Aıta ketý kerek, otandasymyzdyń qarsylasy Djeıms Kırklendti búgingi tańda Enn Volf esimdi kásipqoı bokstaǵy jalǵyz áıel bapker shynyqtyryp júr. Aıta keteıik, 33 jasqa kelgen Kırklend óziniń sońǵy kezdesýinde jeńilip qalǵan bolatyn. Bul aıqas 2015 jyly meksıkalyq Saýl «Kanelo» Alvareske qarsy ótkizilgen bolatyn. Djeıms Kırklend jalpy 34 kezdesý ótkizip, onyń 32 jeńiske jetken.
