Qanat Islam men Danııar Eleýsinov IBF reıtınginen shyǵyp qaldy

NUR-SULTAN. QazAqparat – Halyqaralyq boks federatsııasy (IBF) barlyq salmaq sanatyndaǵy boksshylar reıtınginiń jańartylǵan nusqasyn usyndy, dep habarlaıdy QazAqparat Sports.kz saıtyna silteme jasap.

Nazarlaryńyzǵa qazaqstandyq boksshylardyń pozıtsııalaryn usynamyz:

Ekinshi orta salmaqta Aıdos Erbosynuly tórtinshi ornyn saqtap qaldy. Alǵashqy eki pozıtsııa bos, úshinshi orynda – reseılik Evgenıı Shvedenko. Bul dıvızıondaǵy IBF álem chempıony – meksıkalyq Saýl «Kanelo» Alvares.

Orta salmaqta álem chempıony ataǵy Gennadıı Golovkınge tıesili. Jánibek Álimhanuly toǵyzynshy ornynda qaldy, al Meıirim Nursultanov 12-shi orynnan 13-shi orynǵa tómen tústi, al 14-shi orynda bolǵan Qanat Islam reıtıngke ilinbeı qaldy. Úzdik 15-tiń ishinde birinshi orynda – brazılııalyq boksshy Eskıva Falkao, ekinshi oryn bos, úshinshi orynda – nemis Patrık Voıtsıtskı.

Jartylaı orta salmaqta ótken aıda 13-shi orynda bolǵan Danııar Eleýsinov te reıtıngke ilinbedi. Bul dıvızıonda álem chempıony – amerıkalyq Errol Spens, alǵashqy eki pozıtsııa bos, al úshinshi orynda – onyń otandasy Djaron Ennıs.