Qanat Islam men Danelııa Tóleshova «Halyqtyń súıiktisi» syılyǵymen marapattaldy
ASTANA. QazAqparat - Astanada dástúrli «Halyqtyń súıiktisi» ulttyq júldesiniń jeńimpazdary marapattaldy, dep habarlaıdy «QazAqparat» HAA tilshisi.
Jetinshi ret uıymdastyrylyp otyrǵan bul baıqaý tanymal qazaqstandyq tulǵalar men uıymdardy anyqtaýdy kózdeıdi jáne qazaqstandyqtar ádetegideı, úzdik dep tapqan tulǵalarǵa ınternet arqyly daýys berdi.
Marapattaý keshinde "Úzdik ustaz" nomınatsııasy boıynsha úsh ustaz jeńimpaz dep tanyldy - QR BǴM respýblıkalyq oqytý-ádistemelik ortalyǵynyń dırektory Raısa Sher, Astanadaǵy Oqýshylar saraıynyń dırektory Umsyn Arqabaeva jáne Astanadaǵy №54 mektep-gımnazııasynyń qazaq tili men ádebıeti pániniń muǵalimi Raıa Kelesqyzy marapattaldy.
"Úzdik dáriger" atalymy boıynsha eki dáriger - almatylyq hırýrg-mammolog, QR mammologtary men radıologtary basqarmasynyń tóraǵasy Shynar Talaeva jáne astanalyq hırýrg, medıtsına qyzmetiniń polkovnıgi Erjan Shaıahmetov marapattaldy.
"Úzdik parlamentarıı" atalymynda - QR Parlamentiniń depýtaty Zaǵıpa Balıeva, "Úzdik qoǵam qaıratkeri" boıynsha - «Uly Dala qyrandary» ulttyq qozǵalysynyń tóraǵasy Sádibek Túgel úzdik dep tanyldy. "Men úshin Qazaqstan halqyna qyzmet etý úlken abyroı. Meniń bul baıqaýǵa qatysýymdy surap, saıtqa jazǵan balalarǵa úlken rahmet", - dedi Zaǵıpa Balıeva.
"Úzdik fermer" atanǵan Aral balyq óńdeý zaýytynyń basshysy Amanbaı Erhatov "Halyq súıiktisi" músinshesimen jáne "Atameken" UKP tósbelgisimen marapattaldy. "Úzdik bıznesmen" nomınatsııasynda astanalyq «Jeff Tailor» tigin úıiniń ıesi Gaýhar Ótelbaeva jáne "Úzdik fashion maıtalmany" atalymynda - «Bibisara» brendiniń dızaıneri Ásem Altynbekova jeńimpaz atandy.
"Úzdik sportshy" júldesimen kásipqoı boksshy Qanat Islam jáne "Úzdik sportshy arý" júldesimen - kásipqoı boksshy, bokstan álem chempıony Fırýza Sháripova marapattaldy. "Úzdik sportshy dep tanylǵanymdy maqtan tutamyn. Elimizdiń ımıdjin álemdik arenada asqaqtatý - men úshin úlken abyroı. Rahmet", - dedi Sháripova.
Sondaı-aq, marapattaý keshinde belgili rejısser Aqan Sataev "Úzdik kıno qaıratkeri" atansa, saıasattanýshy Aıdos Sarym men áleýmettanýshy Zarema Sháýkenovaǵa "Úzdik pýblıtsıst" syılyǵy tabystaldy.
Ulttyq syılyqty tabystaý rásiminde BAQ salasynyń ókilderi de nazardan tys qalǵan joq. «QAZAQSTAN» telearnasynyń jýrnalısi Dana Nurjigit "Jyl telejúrgizýshisi", Tengrinews.kz - úzdik aqparat portaly atandy.
Internette belsendiligimen kózge túsken zańger Aıgúl Orynbekke "Blogosfera kóshbasshysy" syılyǵy berildi. Al "Nagımýsha" laqap atymen tanymal Naǵıma Ahmetova "Jyldyń úzdik vaınerleri" atalymynda úzdik dep tanyldy.
Sondaı-aq, ulttyq syılyq keńesi birqatar qurmetti nomınatsııalarmen marapattaýdy jón kórdi. Osylaısha, Ýkraınanyń "Golos. Ditı" án baıqaýynda jeńiske jetken qazaqstandyq Danelııa Tóleshova "Jyl qurmettisi" atandy. "Jyl jańalyǵy" - «Qazaqstan» telearnasyna, "Tabys pen damý" - "QR Ulttyq Paralımpıada komıtetine", "Jyl metsenaty" - Keńes Odaǵynyń batyry Saǵadat Nurmaǵambetov atyndaǵy qaıyrymdylyq qorynyń prezıdenti Mahmut Nálibaevke jáne "Altyn dáýir" qurmetti nomınatsııasy - tanymal aqyn Shómishbaı Sarıevke berildi.
Aıta keteıik, Rixos President Astana qonaq úıinde VII "Halyqtyń súıiktisi" ulttyq syılyǵy jeńimpazdaryn marapattaý keshi ótti. 15 negizgi nomınatsııa boıynsha 150 úmitker iriktelip alyndy jáne 20 jeńimpaz marapattaldy. Syılyq 2011 jyldan bastap berilip keledi jáne Qazaqstandaǵy tanymal kommertsııalyq emes júldelerdiń birine aınaldy.
Marapattaý saltanatynan keıin qaıyrymdylyq aýktsıony ótti. Onda búgingi laýreattar beınelengen sharj sýretter satylymǵa shyǵaryldy. Aýktsıonda Fırýza Sháripova óz portretin 1000 AQSh dollaryna satyp aldy. Aýktsıonnan túsken qarajat qaterli isik aýrýymen kúresip kele jatqan 6 jasar Aıymjannyń emine beriledi.
