Qanat Islam Mádenıet jáne sport mınıstrine bylǵary qolǵap syıǵa tartty
ASTANA. QazAqparat - Birinshi orta salmaqtaǵy WBO Intercontinental jáne WBA Fedelatin tujyrymdary boıynsha Álem chempıony, kásipqoı boksshy Qanat Islam Mádenıet jáne sport mınıstri Arystanbek Muxamedıulyna óziniń qoltańbasy qoıylǵan bylǵary qolǵapty syıǵa tartty, dep xabarlaıdy QazAqparat.
«Óte qýanyshtymyn, qabyldaǵanyńyzǵa úlken raxmet! Almatydaǵy jekpe-jekten soń, Elbasynyń sálemin jetkizdińiz. Shet elde, Amerıkada qanshama jekpe-jek ótkizip júrmiz, osynyń barlyq maqsaty, aınalyp kelgen kezde, bizdiń eldiń abyroıyn kóterý», - dedi Qanat Islam mınıstrmen ótken kezdesý barysynda.
Óz kezeginde QR Mádenıet jáne sport mınıstri Qanatty sońǵy ótken jekpe-jektegi jeńisimen quttyqtady.
«Qanatty biz taǵy da quttyqtaımyz. Jaqsy boldy, ári kelgen saıyn Qanat bir úlken jeńispen keledi. Ylǵı da bir qýanyshty xabarmen keledi. Ásirese, eń sońǵy kezdesýi óte qyzyqty boldy. Artynan elge jalyndy sálemińdi atqanyń, búkil Qazaqstanǵa raxmet aıtqanyń, ár adamnyń oı-armanyn jetkizý ol úlken maqsat. Ol jaǵynan óte qýanyshtymyz. Taǵy da quttyqtaımyz ózińdi», - dedi Arystanbek Muxamedıuly.
Kezdesýdiń resmı bóligi aıaqtalysymen, Qanat Islam óz komandasy atynan mınıstr A. Muxamedıulyna óziniń qoltańbasy qoıylǵan bylǵary qolǵapty syıǵa tartty.
Aıta keteıik, 18 aqpanda Ýılmıngton qalasynda (AQSh, Delaver shtaty) WBO Intercontinental jáne WBA Fedelatin tujyrymdary boıynsha Álem chempıony, birinshi orta salmaqtaǵy Qanat Islam (22-0-0, 19 KO) brazılııalyq Robson Assısti (17-4-0, 9 KO) birinshi raýndta deńgen bolatyn.
Álemge «Qazaq» degen atpen tanylǵan Qanat Islamnyń bul kásipqoı rıngtegi 23-shi kezdesýi edi.
