Qanat Islam qoly synǵanyna qaramastan sońyna deıin judyryqtasty - Qazaq promotions

ALMATY. QazAqparat - Kúni keshe namıbııalyq Ýolter Kaýtondokvany jeńgen qazaqstandyq boksshy Qanat Islam sońǵy 4 raýndta synyq qolymen judyryqtasqan, dep habarlaıdy QazAqparat.

Qazaq Promotions promoýterlik kompanııasy oń qoly gıpstelgen sportshynyń sýretin jáne rentgen keskinin usyndy.

Eske sala keteıik, keshe qazaqstandyq kásipqoı boksshy Qanat Islam namıbııalyq Ýolter Kaýtondokvamen qolǵap túıistirip, jeńiske jetken bolatyn.

Aıqas Almaty qalasyndaǵy Balýan Sholaq atyndaǵy sport saraıynda ótti. Jekpe-jek on raýndqa sozyldy. Tóreshiler sheshimimen Qanat Islam jeńip, WBO belbeýine qol jetkizdi. Ol osylaısha 27-shi ret qarsylasynan basym túsip otyr.

Búgin Almaty qalasynyń ákimi Baqytjan Saǵyntaev boksshy Qanat Islamdy jeńisimen quttyqtady.

Aıta keteıik, qazaqstandyq Qanat Islam 2012 jyldyń 28 qyrkúıeginen beri kásipqoı boksta synǵa túsip júr. Búgingi kúnge deıin 27 jekpe-jek ótkizip, onyń barlyǵynda qarsylasynan basym tústi. Onyń 21-in nokaýtpen aıaqtaǵan.