Qanat Islam Klımaspen kelisim jasalǵanyn joqqa shyǵardy
ASTANA. QazAqparat - Qazaqstandyq boksshy Qanat Islam lıtva-amerıkalyq menedjer Egıs Klımaspen seriktestik týraly aqparatqa pikir bildirdi, dep habarlaıdy Sports.kz.
Eske salaıyq, otandyq boksshynyń tanymal menedjermen kelisim jasalǵany týraly jańalyq keshe BAQ-ta jarııalanǵan bolatyn. Qanat Islam komandasynyń Instagram-daǵy resmı paraqshasynda bul aqparattyń jalǵan ekendigi jarııalandy. Qazaqstandyq Klımaspen kelisim jasamaǵan.
Klımas Vasılıı Lomachenko, Aleksandr Ýsık, Aleksandr Gvozdık jáne Sergeı Kovalev sııaqty boksshylarmen jumys istegen. Sondaı-aq, ol basqa qazaqstandyqtardyń - Madııar Ashkeev, Meıirim Nursultanov pen Ashat Ýalıhanovtyń isin júrgizedi. Klimas Management boksshylary AQSh-taǵy boks keshterinde únemi jekpe-jekke shyǵyp turady.
Budan buryn Qanat Islam komandasy «jaqsy jańalyq kútińizder» dep, AQSh-qa ushyp ketkendigin habarlaǵan edi.
