Qanat Islam kelesi jekpe-jegine daıyndyǵyn bastady
ASTANA. QazAqparat - Qazaqstandyq boksshy Qanat Islam kelesi jekpe-jegine daıyndyǵyn bastady. Bul týraly jýrnalıst Berik Sultan óziniń feısbýktegiparaqshasynda habarlady.
«Daıyndyqty bastap jiberdik. Qanat Islamnyń kelesi jekpe-jegine kıetin shorty dızaıny bitti. Bul joly aq tústi tańdap otyrmyz. Shortydyń eki jaǵy da oıýmen órnektelgen. Sol qaptalynda bokshynyń jeke logotıpi ornalasqan. Al belinde (aldynda) boksshynyń esimi men tegi, shortydyń artynda laqap aty jazylǵan. Buıyrtsa, jaqyn kúnderi kásipqoı rıngte áli jeńilmegen batyr uldaryńyzdyń kelesi judyryqtasatyn kúni men ýaqytyn málimdeımiz. Bul joly da jekpe-jekke bas demeýshilik tanytyp otyrǵan «Zhersu» korporatsııasy, ıaǵnı Baýyrjan Ospanov.
Eske sala keteıik, Baýyrjan Ospanov - Qanat Islamnyń osy ýaqytqa deıin ótkizgen barlyq jekpe-jeginiń bas demeýshisi ári janashyr aǵasy. Sondaı-aq bul jolǵy judyryqtasýǵa ózindik qoldaýyn bildirip, demeýshiler qatarynan kóringen shymkenttik «Nuray construction» qurlys kompanııasy, onyń basshysy sport janashyry Altaı Aınabek myrzaǵa da erekshe alǵys bildiremiz. Jeńiske birge jeteıik! Jekpe-jek týraly resmı habarlama kútińizder. AQSh-taǵy boks keshin «Qazaqstan» ulttyq arnasy kórsetedi dep josparlanýda. Qazaqtar, alǵa!» - dep jazdy Berik paraqshasyna.
Aıta keteıik, Qanat Islam 2012 jyly birinshi orta salmaqta WBA Fedecaribe tıtýlyn jeńip aldy. Sportshy 2008 jylǵy Olımpıada oıyndarynyń qola júldegeri. QR eńbek sińirgen sport sheberi. Buryn «Astana Arlans» (WSB) komandasynyń kapıtany bolǵan.
