Qanat Islam: Qazaq boksynda jastardyń tegeýrini qýantty
ASTANA. QazAqparat - Qazaq boksynda jastardyń tegeýrini qýantty, deıdi qazaqstandyq boksiy Qanat Islam «Jas Alash» gazetine bergen suhbatynda.
- Qanat, elge aman-esen oralýyńmen! Áıgili promoýter El Heımonmen kelisimshartqa qol qoıdyń. Demek, kásipqoı boksta órleýge múmkindik týdy ǵoı.
- Árıne, El Heımonnyń esimi kásipqoı boksta orasan bedelge ıe. AQSh-ta ǵana emes, álemge de bedeldi tulǵa. Ózgesin aıtpaǵannyń ózinde kishi Floıd Meıvezerdiń sońǵy jekpe-jegine deıin menedjeri boldy. Qandasymyz Beıbit Shúmenovke de promoýter bolyp júr. Biz osy kelisimshartty segiz aıǵa jýyq kúttik. Osy aralyqta túrli usynystar, ózge promoýterlik kompanııalardan shaqyrtýlar boldy. Biraq olardyń usynys, sharty bizdiń talǵamymyzdan shyqqan joq. El Heımonnyń promoýterlik kompanııasy kelesi jyly bes jekpe-jek ótkizýge múmkindik týǵyzamyz dep otyr.
- Aldaǵy jekpe-jekterde qarjylaı syıaqy tólene me?
- Osy kúnge deıingi ótkizgen aıqastarymnyń deni dáreje kóterý úshin boldy. Maıtalman menedjer El Heımonmen tize qosyp jumys isteıtin bolǵandyqtan, endigi aıqastarda syıaqy tólenýi tıis.
- Qazaq boksyna eńbegi sińgen bapker Ǵalym Jarylǵapovty eske túsirýge arnalǵan halyqaralyq týrnırdi tamashaladyń. Boksshylarymyzdyń shama-sharqy qaı deńgeıde eken?
- Ulttyq quramanyń beldi boksshylary atanyp, birneshe jyldan beri birinshi nómirli atanyp júrgen keı boksshylardyń atynan aýyp qalýynan-aq týrnırdiń dárejesi qaı deńgeıde ekenin baǵamdaýǵa bolady. Qazaq boksynda jastardyń tegeýrini qýantty. Álem chempıonatynda, jazǵy Olımpıada oıyndarynda olja salyp júrgen sańlaqtardy súrindirgen jastardyń jigerli ekenine razy boldym.
- Osy týrnırge Qytaı quramasy da qatysty. Hanzýlardyń qatarynda qazaq boksshylary bolǵanyna razy boldyq. Óziń on márte Qytaı chempıonatynda top jardyń, álem chempıonatynyń, Beıjiń Olımpıadasynyń qola júldesin ıelendiń.
- Ókshemizdi basyp kele jatqan jastardyń Qytaı quramasyna enýi - orasan jetistik. Mıllıardtaǵan hanzýdyń arasynda júrip, quramaǵa iliný úshin az kúshińdi sarqymaısyń. Bizden keıin jarqyrap kóringen jigitterdiń jekpe-jegin osy týrnırde baǵamdadym, judyryqtasý sheberlikteri shyńdalyp keledi eken.
Suhbattasqan N. Jomart
