Qanat Islam qarsylasy Veramen bolatyn aıqastan bas tartqan joq
ASTANA.QazAqparat - Qazaqstandyq kásipqoı boksshy Qanat Islamnyń (25-0-0, 20KO) komandasy FaceBook-tegi resmı paraqshasynda málimdeme jarııalap, Qanattyń Dúnıejúzilik boks qaýymdastyǵy (WBA) belgilegen mindetti qarsylasy Jon Veramen (18-0-0, 11KO) bolatyn jekpe-jek týraly pikir bildirdi, dep habarlaıdy QazAqparat.
Boksshynyń komandasy otandasymyzdyń jekpe-jekke daıyndalyp jatqanyn aıta kelip, bul kúnde kelissózderdiń júrip jatqany jáne Qanat jekpe-jekten bas tartty degen aqparattyń shyndyqqa janaspaıtyndyǵyn málimdedi.
«Biz tek kelissóz jumystary júrip jatqanyn ǵana bilemiz. Ózimiz kópten kútken Álem chempıony ataǵyna jaqyndatatyn bul aıqastan qalaı bas tartamyz? Qanat Islam bul jekpe-jekten bas tartqan joq. Bul aqparat qaıdan shyqqanyn anyqtaımyz» -, dep jazylǵan málimdemede.
Aıta keteıik, buǵan deıin otandyq BAQ-tarda Qanat Islamnyń Veramen bolatyn kezdesýden bas tartqany týraly habarlanǵan bolatyn.
Eske sala keteıik, WBA qaýymdasty 21 qarashada Qanat Islamnyń mindetti qarsylasy retinde amerıkalyq Jon Verany belgiledi. Jekpe-jekti uıymdastyrýǵa eki boksshynyń komandasyna 30 kún ýaqyt berilip, jeńgeni WBA chemıony Erıslandı Laranyń (25-2-2, 14 KO) mindetti qarsylasy atanýǵa múmkindik alady.
