Qanat Islam «Kanelomen» judyryqtasady - Nelson Lopes
«Biz qazir álemdik reıtıngte segizinshi oryndamyz, biraq birinshi bolýymyz kerek. Eger biz chempıon bolǵymyz kelse, «Kanelony» jeńýimiz kerek. Qandaı ataqqa talasatynymyz mańyzdy emes, sońynda «Kanelony» Qazaqstanǵa ákelgimiz keledi. Biz oǵan qarsy shyǵamyz. Eskerte keteıin, bul jerde maǵan jáne meniń komandama aqsha kerek emes. Biz jekpe-jek ótkizimiz keledi. Bul - meniń ǵana emes, Qanat Islam men Darhan Muhtarbektiń de armany. Biz bul úshin barymyzdy salamyz», - dedi Qanat Islamnyń menedjeri Nelson Lopes .
Sondaı-aq, ol eger «Kanelo» joǵary salmaqqa kóterilse, Qanat sol salmaqqa aýysýǵa daıyn ekenin aıtty.
«Áýesqoı boksta men 69 jáne 75 keli salmaq dárejesinde judyryqtastym. Jaqynda 69.9 salmaqtan 72-ge aýystym. Qazir bul salmaqta Demetrıýs Andrade chempıon, biz onymen kezdespedik. Biraq onyń áýesqoı bokstaǵy tehnıkasy jaqsy. Onyń qatty soqqysy joq, ol aıaǵymen kóp jumys isteıdi. Ony jeńýge bolady. Kanelo týraly aıtatyn bolsaq, ol qarapaıym boksshy. Múmkin, ol kóp soqqy jasaıtyn shyǵar. Biraq, onyń tórt qoly, tórt aıaǵy joq qoı. Men ǵana emes, onymen kez kelgen qazaq 12 raýndqa shydap, judyryqtasa alady. Biz, qazaqtar, ózimizdi baǵalamaımyz, ózgelerdi kótermeleımiz. Biz shetelde jetistikke jetkenderdi ǵana bilemiz. Bizdiń boksshylardyń bári myqty, men solardyń bárin qoldaýǵa shaqyramyn», - dep tolyqtyrdy Qanat Islam.
Buǵan deıin, Qanat Islam meksıkalyq Saýl «Kanelo» Alvarespen rıngke shyǵýǵa daıyn ekenin aıtqan bolatyn.
Aıta keteıik, 26 qazanda Balýan Sholaq atyndaǵy sport saraıynda kásipqoı boks keshi ótedi, onda Qanat Islam (26-0, 21 KO) men namıbııalyq boksshy Ýolter Kaýtondokva (18-1, 17 KO) negizgi jekpe-jekte judyryqtasady.
Boks keshi aıasynda Dáýlet Dáýkenov, Saparbaı Aıdarov, Beksultan Raýshanov, Nursultan Amanjolov, Asqar Erýbek, Arman Rysbek jáne Rýslan Myrsataev sııaqty qazaqstandyq boksshylardyń qatysýymen 9 jekpe-jek ótedi. Olardyń qarsylastary - AQSh, Qytaı jáne Eýropa elderiniń ókilderi.