Qanat Islam Hýan de Anheldi 6 raýndta tehnıkalyq nokaýtpen tize búktirdi
ASTANA. QazAqparat AQSh-tyń Florıda shtatyndaǵy Leıklend qalasynda ótken kásipqoı bokstan WBA Fedelatin jáne WBA FideCaribe nusqalary boıynsha Álem chempıony Qanat Islam men Hýan de Anhel arasyndaǵy jekpe-jek 6 raýndtan asqan joq.
Bul joly jerlesimiz on raýndqa josparlanǵan kezdesýdi merziminen buryn aıaqtap, kolýmbııalyq boksshyny tehnıkalyq nokaýtpen tize búktirdi.
«Qazaq» laqap atymen álemdik kásipqoı boksta tanyla bastaǵan Qanat Islamnyń bul sharshy alańdaǵy 21-i kezdesýi bolatyn. Ol buǵan deıingi jıyrma kezdesýiniń barlyǵynda jeńiske jetip, onyń 17-isinde qarsylastaryn nokaýtpen sulatqan edi. Endi nokaýtter sany 18-ge jetip otyr, sonyń ishinde jerlesimiz qatarynan alty kezdesýdi merziminen buryn aıaqtady.
Qanat Islamnyń qarsylasyna kelsek, kolýmbııalyq Hýan De Anhel 2008 jyldan beri kásipqoılar arasynda jekpe-jekter ótkizip keledi. Sharshy alańdaǵy 22 kezdesýinde bireýin teń nátıjemen aıaqtap, 18 ret jeńis tuǵyryna kóterilgen. Búgingi nokaýtty qosa alǵanda tórt ret qarsylastaryna ese jiberdi. Eki boksshy da AQSh-ta jattyǵady ári ekeýi de «Nelson Lopez Jr» promoýterliginiń boksshylary bolatyn.
Qanat Islam buǵan deıin 9-mamyr Jeńis kúnine oraı jerlesteri men jankúıerlerine taǵy bir «nokaýtpen» syılyq joldaıtynyn aıtqan bolatyn. Ol ýádesinde turdy. Jeńis qutty bolsyn, aǵaıyn!
