Qanat Islam Golovkın salmaǵyndaǵy álem chempıonymen jekpe-jekke shyǵýy múmkin
NUR-SULTAN. QazAqparat – Qazaqstandyq orta salmaqtaǵy boksshy Qanat Islam (28-0, 22 KO) WBC nusqasy boıynsha osy dıvızıondaǵy álem chempıony, amerıkandyq boksshy Djermall Charlonyń (31-0, 22 KO) áleýetti qarsylasy retinde qarastyrylyp otyr, dep habarlaıdy QazAqparat Sports.kz portalyna silteme jasap.
Bul týraly kásipqoı boks áleminiń ınsaıdtary men jańalyqtaryn jarııalap júrgen Boxing Media UK tvıtter-akkaýntynda jazyldy.
«Djermall Charlonyń áleýetti qarsylastarynyń arasynda Masıas Montel, Andreı Sırotkın, Qanat Islam bar», — dep jazylǵan áleýmettik jelide.
Bul rette Charlomen chempıondyq judyryqtasýǵa eń kóp múmkindikke ıe boksshy – RBC platformasynda jekpe-jek ótkizýde tájirıbesi mol Montel ekenin atap ótken.
Eske sala ketsek, Qanat Islam rıngke taıaýda ǵana shyqqan edi – 20 aqpanda AQSh-tyń Florıda shtatynyń Maıamı qalasynda ótken aıqasta ol jetinshi raýndta ekvadorlyq Djeıson Mındýny (14-4-1, 8 KO) nokaýtqa túsirdi. Charloǵa keletin bolsaq, ol 2020 jyldyń qyrkúıeginen beri judyryqtaspaǵan. Sońǵy jekpe-jegi Konnektıkýt shtatynyń Ankasvıll qalasynda ótip, onda tóreshilerdiń biraýyzdan qabyldaǵan sheshiminen Ýkraına boksshysy Andreı Derevıanchenkodan (13-3, 10 KO) basym túsken edi.
Atap óteıik, orta salmaqta sondaı-aq Qazaqstannyń taǵy bir ókili, IBF jáne IBO tıtýldarynyń ıegeri Gennadıı Golovkın (41-1-1, 36 KO) bar.