Qanat Islam: Golovkın ekeýmiz de Qazaq eliniń namysyn qorǵap júrmiz
ASTANA. QazAqparat - Kásipqoı boksta Qazaqstan namysyn qorǵap júrgen boksshylarymyz saýsaqpen sanarlyq. Onyń ishinde búgingi tańda Gennadıı Golovkınniń aıy ońynan týyp tur. Oǵan eshkimniń talasy joq. Óte talantty, namysshyl boksshy. Búginge deıin birde-bir jeńilistiń aşy dámin tatyp kórgen joq. Ulty ózge bolsa da, qazaqtyń kesteli tonyn jamylyp, Kókbaıraǵyn jelbiretip keledi. Al, kásipqoı bokstaǵy qazaq ulandary týraly áńgime qozǵaı qalsaq, birden esimizge qandasymyz Qanat Islam oralady...
Bar-joǵy eki jyl ishinde 18 jekpe-jek ótkizip, barlyǵynda jeńiske jetken Qanattan qazaq eli úlken úmit artyp otyr. Tipti, jaqynda aqparat quraldarynda aldaǵy ýaqytta qazaq ulany Gennadıı baǵyndyrǵan bıikti baǵyndyrý bylaı tursyn, oǵan «qaýip tóndiredi» degen alyp-qashpa áńgimeler shyǵyp, oqyrman qaýymnyń qyzý talqysyna aınaldy. Jurt: «eki qazaqstandyq boksshynyń judyryǵy qashan sharshy alańda túıisedi?» dep alasurdy. Árıne, bokssúıer qaýymǵa qyzyq kerek.
Mundaı áńgime qalaı paıda boldy? Búgin Qanattyń ózimen sóılesýdiń sáti túskennen keıin, osy másele týraly taǵy da oqyrman qaýymmen oı bóliskendi jón kórip otyrmyz.
Negizi, bul pikirdi birinshi bolyp halyq nazaryna usynǵan Qanat Islamnyń promoýteri - Nelson Lopes. Ol jýrnalısterge bergen bir suhbatynda Qanattyń qarymdy boksshy ekenin aıta kelip: «kásibı rıngte atoılap júrgen qazaqstandyq boksshy - Gennadıı Golovkınge biraz qıynshylyq kórsete alamyz» dep aıtyp qalady. Bul jerde bapkerdiń oıy Qanattyń qanshalyqty deńgeıdegi boksshy ekenin aıtý bolatyn. Onyń kúsh-jigerin Golovkınnen kem emes dep túsindirgisi keldi. Ókinishke qaraı, BAQ ókilderi otyz tisten shyqqan sózdi otyz rýly elge kúni erteń judyryqtasqaly jatqandaı súıinshilep jetkizdi. Taratylǵan aqparattyń tartymdylyǵy sonshalyq, jaı bokssúıer qaýym ǵana emes, belgili sportshylar da, sport sarapshylary da, sport mamandary da óz oılaryn ortaǵa salyp, qos sańlaǵymyzdy bir aptadaı «qııaldarymen» judyryqtastyryp aldy. Jeńimpazdaryn da anyqtap, syı-sııapatyn da berip tastady. Bul durys pa?
Meıli, Qanat bolsyn, meıli Golovkın bolsyn ekeýiniń de áli baǵyndyrar bıigi alda ekenin kóziqaraqty oqyrman jaqsy biledi. Ekeýiniń de ózderi óner kórsetip júrgen salmaqtarynda áli bokstasyp úlgermegen talaı myqty qarsylastary jeterlik. Sondaı-aq, ekeýi de sharshy alańda eki túrli salmaqta óner kórsetedi. Ekeýi judyryqtasý úshin áýeli olar óz salmaqtarynda jer betinde teńdessiz atanýy kerek. Ekeýine de ózderi óner kórsetetin eki túrli salmaq sanatynda qarsylas qalmaı, judyryqtaryn kimge silterin bilmeı ańtarylǵan kúni «endi bir-birińmen shyǵyńdar» dese qalaı bolady eken?! Al odan buryn eki otandasymyzdy bir-birine qarsy qoıý bir otbasynda týǵan, bir nandy birge bólip jegen, eki egiz uldy eregestirip, tóbelestirgenmen birdeı degen sóz. Bul bizdiń pikirimiz jáne tilegimiz. Tilegimiz degende ekeýi judyryqtaspasa eken dep otyrǵamyz joq. Ekeýiniń óz salmaqtarynda qarsylastary qalmaı, sosyn baryp, bir-birin kezdesýge shaqyrsa degen oı. Al bul týraly boksshylardyń ózi ne dedi? Endi sol jaıynda qysqasha toqtalyp ótsek. Jaqynda Gennadıı Golovkın Astanada Nazarbaev Ýnıversıtetinde qonaqta boldy. Jankúıerlerimen júzdesý barysynda Qanat Islam men óziniń arasyndaǵy daýly pikir de nazardan tys qalǵan joq. Sonda jýrnalıstiń suraǵyna jaýap bergen Gennadıı Golovkın: «Bul áńgime týraly dál qazir sóz qozǵaý esh qısynǵa kelmeıdi. Sebebi Qanat ekeýimiz eki salmaqtyń boksshylarymyz. Sondaı-aq, ekeýimizdiń reıtıngtik kórsetkishimiz de eki túrli. Men Qanatty kópten beri bilemin. Biz kezdesip, aralasyp turamyz. Menińshe ol jeke ózi meni jekpe-jekke shaqyrmaýy múmkin. Ony onyń bapkeri jasasa kerek. Qazirgi kezde bizdi salystyryp nemese qarsy qoıatyndar kóbeıip ketti. Mundaıdy doǵarý qajet», - dep atap ótti. Óte oryndy jaýap. Boksshynyń ózi aıtqandaı, bul áńgimeni údetýdi doǵarǵanymyz jón sııaqty.
Al osy talas-tartysqa baılanysty Qanat Islam da qarap qalǵan joq. Ol da óziniń pikirin ashyq bildirdi.
Ol: «Golovkın meniń qarsylasym emes, ol eń áýeli meniń otandasym, tilekshim. Ekeýmiz de Qazaq eliniń namysyn qorǵap júrmiz. «Ákem - orys, sheshem - káris, ózim - qazaqpyn» dep álemge jar salǵan Gena men úshin de qazaq. Al qazaqtyń atynan shyǵyp, Qazaqstannyń týyn jelbiretip júrgen dosymmen qolǵap túıistirý - ol osy eldiń azamaty bolyp turǵanda esh qısynǵa kelmeıtin dúnıe. Mende at jarystyrý men ataq talastyrý qasıetimde joq. Eger, ataq, mánsap qýsam ata-jurtyma oralmaı-aq, Qytaıda júre berer edim. Maǵan keregi Alash jurtynyń abyroıy. Álemde qazaqtyń Kókbaıraǵy jelbiregeni kerek. Qaıda júrsem de qazaqtyń týyn jelbiretip, Ánuranyn asqaqtatyp júrsem sodan artyq baqyt joq. Al osy Qazaqstan degen úlken qara shańyraǵymyzdyń Baıraǵyn birge jelbiretip, namysyn birge qorǵap júrgen qos batyryn bir-birine qarsy qoıý degen aqylǵa syımaıtyn dúnıe. Men buny ultqa, rýǵa bóletin arandatýshylyq dep túsinem», - dep atap ótti.
Iá, el ne demeıdi?! «Qońyraýsyz kerýenniń sáni qaıda?» demekshi, aty shyqqan batyrlarymyzdyń artynan osyndaı sóz ermese de sáni kelmeıtin sııaqty.
Aıtpaǵymyz, qazaq eliniń abyroıyn asyryp júrgen eki batyrymyz da aman bolsyn! Sharshy alańda kezdese me, kezdespeı me, ol aldaǵy ýaqyttyń enshisi...
Kúnsultan Otarbaı
