Qanat Islam: Gennadıı ekeýmizdi qarsy qoıý aǵaıyndy Klıchkolardy bir-birimen tóbelestirgenmen birdeı
ASTANA. QazAqparat - «Gennadıı ekeýmizdi qarsy qoıý aǵaıyndy Klıchkolardy bir-birimen tóbelestirgenmen birdeı», - dedi Qanat Islam «QazAqparat» halyqaralyq aqparattyq agenttigine ekslıýzıvti suhbat bergen kezinde.
Esterińizde bolsa, jaqynda BAQ ókilderi Qanat Islammen Gennadıı Golovkın judyryqtasýy múmkin ekenin jarysa jazyp, qyzý talqyǵa salǵan bolatyn. Búgin Qanat bul pikirdi joqqa shyǵardy.
«Ár boksshy óziniń bapkerine «altyn» ekeni anyq! Meniń bapkerim Nelsonǵa bireýler «Qanatty Gennadıımen judyryqtastyrǵyń kelmeı me?» degen baǵytta hattar jibergen. Ony kim jibergeni belgisiz. Al oǵan bapkerim: «Bári de múmkin» dep jaýap bergen. Mine, bul áńgime osydan bastalǵan. Gena - myqty boksshy. Ol - bizdiń aldymyzdaǵy tý. Aldymyzdaǵy tý qulamasyn, kásipqoı boksqa kesh qosylǵan bizder de aldymyzdaǵy týdyń qulamaǵanyn qalamaımyz», - dep atap ótti Qanat Islam.
Sonymen qatar Qanat Gennadıımen óte jaqsy qarym-qatynasta ekenin, ekeýi bir-birin áýesqoı boksta júrgennen beri tanıtynyn, talaı jattyǵý zaldarynda birge jattyqqanyn, qazir de jaqsy aralasyp turatynyn jasyrmady.
«Men Gennadııdi sportshy retinde de, azamat retinde de jaqsy syılaımyn. Biz, kezinde Gena, Baqtııar Artaev, Baqyt Sársekbaevtar bárimiz bir salmaqtyń boksshylary boldyq. Shette júrsem de Qazaqstanǵa jıi kelip júrdim. Qazaqstandyq bapkerlerden de kóp tálim aldym. Elimizdegi barlyq boksshylardy jaqsy bilemin. Bokstaǵy óz zamandastarymmen jıi qabarlasyp, aralasyp turamyn. Biraq, áýesqoı boksta Genamen sharshy alańda kezdesip kórgen joqpyn. Kásipqoı boksta da kezdespeımiz. Sebebi, Gena ekeýimiz de bir eldiń, qazaq topyraǵynyń namysyn qorǵap júrmiz. Al bizdi bir-birimizge qarsy qoıý aǵaıyndy Klıchkolardy bir-birimen tóbelestirgenmen birdeı. Sondyqtan, bul múmkin emes», - dep osy kúnge deıingi alypqashpa áńgimelerge núkte qoıdy.
Kúnsultan OTARBAI
