Qanat Islam: Gena ekeýmizdi judyryqtastyrǵysy keletinderdi men túsinbeımin
ASTANA. QazAqparat - Qazaqstandyq boksshy Qanat Islam Gennadıı Golovkınmen jekpe-jekke shyǵýǵa qatysty óz oıyn aıtty, dep jazady oishogyr.kz.
- Qanat aǵa, sońǵy kezderi áleýmettik jelilerde, saıttarda sizdi Genadıı Golovkınmen jekpe-jekke shyǵady degen jazbalar kóp jazylyp jatyr. Osy máseleniń aq-qarasyn ashyp aıtyp berińizshi. Búgin osy taqyrypqa núkte qoıaıyqshy. Genamen judyryqtaýyńyz múmkin be?
- Men Genany dosym retinde, chempıon retinde, aǵam retinde qatty syılaımyn. Gena - kók týdy jelbiretip júrgen qazaqtyń batyry. Gena ekeýmizdi judyryqtastyrǵysy keletinderdi men túsinbeımin. Ókinishke qaraı, qazir kóp adam jeke bastyń múddesin oılaıdy. Biz ulttyq deńgeıde oılansaq qana ózgege mazaq bolmaımyz. Bizge eki qazaqtyń shetelde bir-birimen judyryqtasqany kerek pe? Álde, shetelde ekeýi eki jaqtan kók týdy jelbiretip júrgeni kerek pe? Bizge qaısysy qyzyq? Qaısysy mańyzdy? Aldymen ózimizge osy suraqty qoıyp kóreıikshi. Qytaıda erejesiz jekpe-jekte bir-birine qol kótermegen qazaqtardy bilesizder. Biz Gena ekeýmiz sol jigitter sııaqtymyz. Golovkın on jeti mıllıon qazaqstandyqtardyń aldynda "Men - qazaqpyn!" degenin estidińizder. Men Genany ózimniń baýyrym dep esepteımin. Biz - qazaqpyz. Ózge eldiń aldynda bir-birimizdi sabamaımyz. Ata-babamyz: "Jaqsy sóz jarym yrys" deıdi. Jaqsy sóz ol - bata. Bata - ol duǵa. Azamattyqtyń eń bıik deńgeıi qolymen járdem berý. Oǵan shama kelmese jaqsy sóz aıtyp, demeý bolý. Al, oǵan da shama kelmese - úndemeý. Al, azamattyqtyń eń tómen deńgeıi ol jaqsy sózdi qımaý, kóre almaý. Alla bizdi osydan saqtasyn. Qazaqtar bir-birin kótermelese ǵana, ózgelerdiń ultymyzǵa degen qurmeti oıanady. Gena ekeýmizdiń judyryqtasqanymyzdan biz eshteńe utpaımyz. Kerisinshe ult retinde utylamyz. Ulttyq deńgeımen oılap qarasańyz, álem aldynda masqara bolamyz. Keıbireýler, bul - sport. Bári múmkin. Judyryqtasqanda turǵan ne bar deıtin shyǵar. Men sportshydan buryn - qazaqpyn. Maǵan sporttaǵy jetistik emes, maǵan qazaqtyń álem aldyndaǵy abyroıy men bedeli qymbat. Gena kók týdy kóterip júrgen bizdiń serkemiz. Týymyz jyǵylmasyn dep Genanyń artynda tursam da, men úshin úlken abyroı. Kóp inilerim maǵan: "Aǵa, siz sııaqty bolǵymyz keledi", - deıdi. Men olarǵa: "Men sııaqty bolmańdar. Menen de myqty bolyńdar", - deımin. Bizden de myqtylar shyqsa biz utylmaımyz, kerisinshe biz utamyz. Álemdi moıyndatamyz. Tarıhta batyr babalarymyz jastarǵa bilgenin úıretip, ózderinen de myqty qylyp tárbıelegen. Men de sol babalarymyz sııaqty, júreginde oty bar jastardy qasyma alyp, ózimnen de myqty qylyp tárbıelegim keledi. Qazaqtyń júrek jutqan ultjandy sportshylary kóbeıse, álem sportshylary bizge qarap boı túzeıtin bolady.
