Qanat Islam: Elbasy EKSPO-da jekpe-jek ótkizýge shaqyrdy
ASTANA. QazAqparat - WBO Intercontinental jáne WBA Fedelatin tujyrymdary boıynsha Álem chempıony, birinshi orta salmaqtaǵy Qanat Islam (22-0-0, 19 KO) Astanada EKSPO kezinde boks keshin ótkizýge daıyn ekendigin málim etti, dep xabarlaıdy QazAqparat.
«Bıyl Astanada taǵy da úlken jekpe-jek kútip tur. Elbasy bizdi Astanadaǵy EKSPO-da jekpe-jek ótkizýge shaqyrdy. Alǵysym sheksiz. Soǵan jaqsy daıyndalyp, búkil qazaqtyń jigitteri Astanada EKSPO-da qazaqtyń kók týyn jelbiretip, búkil álemge taǵy da bizdiń kásipqoı bokstyń myqty deńgeıge kóterilgenin dáleldeımiz dep oılaımyn. Sizderge alǵysym sheksiz. Alǵa Qazaqstan! Jasasyn táýelsiz Qazaq eli! Raxmet!», - dedi ol Robson Assıspen ótken jekpe-jekten soń bergen suxbatynda. Ony Órken Kenjebek Feısbýktaǵy paraqshasynda jarııa etti.
Aıta keteıik, búgin Ýılmıngton qalasynda (AQSh, Delaver shtaty) WBO Intercontinental jáne WBA Fedelatin tujyrymdary boıynsha Álem chempıony, birinshi orta salmaqtaǵy Qanat Islam (22-0-0, 18 KO) brazılııalyq Robson Assıspen (17-4-0, 9 KO) kezdesý ótkizip, qarsylasyn birinshi raýndta sulatyp saldy.
Boksshylardyń kezdesýi kishi Roı-Djonstyń boks keshiniń aıasynda ótken bolatyn. Bul álemge «Qazaq» degen atpen tanylǵan Qanat Islamnyń kásipqoı rıngtegi 23-shi kezdesýi.
Qanat osyǵan deıin 22 kezdesýinde jeńiske jetip, onyń 18-in nokaýtpen aıaqtaǵan.
