Qanat Islam el chempıonatyndaǵy úzdik salmaqtardy atady
ASTANA. KAZINFORM – Tarazda ótken bokstan eresekter arasyndaǵy Qazaqstan chempıonaty jas boksshylardyń áleýetin baǵamdap, ulttyq quramanyń aldaǵy mindetterin saralaýǵa múmkindik berdi. El birinshiliginiń fınaldyq jekpe-jekterin tamashalaǵan belgili bylǵary qolǵap sheberi Qanat Islam birqatar sportshynyń ónerine joǵary baǵa bergenimen, keıbir salmaq dárejelerindegi olqylyqtarǵa da nazar aýdardy.
Informsports.kz tilshisine bergen suhbatynda ol chempıonattyń deńgeıi, jas talanttardyń múmkindigi, ulttyq quramanyń aldaǵy jumysy jáne otandyq mekteptiń damýyna qosatyn úlesi týraly pikir bildirdi.
– Qanat, Qazaqstan chempıonatynyń fınaldyq jekpe-jekterin tamashaladyńyz. Jalpy jarys deńgeıi kóńilińizden shyqty ma? Alǵan áserińiz týraly aıtyp berińizshi...
– Men chempıonatty alǵashqy kúninen bastap onlaın, teledıdar arqyly baqyladym. Jańa jas tulǵalar, tyń esimder kórinip jatqany qýantady. Sońǵy jarys kúninde 60 kelide Jetisý oblysynyń ókili óner kórsetti. Onyń jekpe-jegi maǵan erekshe unady. Buǵan deıingi kezdesýlerin de kórgen edim.
– Qaı salmaq dárejelerindegi boksshylardyń áleýetin joǵary baǵaladyńyz? Al qaı baǵytta jumys isteý qajet dep sanaısyz?
– 70 jáne 75 kelidegi jigitterdiń deńgeıi álemdik arenadaǵy boksshylardan esh kem emes dep oılaımyn. Endigi mindet – olardyń sheberligin odan ári shyńdaý. Óıtkeni Olımpıada oıyndary men álem chempıonattaryndaǵy báseke jyl ótken saıyn kúsheıip keledi.
Bul chempıonatta tańǵalarlyq kezdesýler boldy. Degenmen keıbir salmaq dárejelerinde kóńil kónshiterlik boks kórmedim. Ásirese aýyr salmaqta aıtarlyqtaı jumys isteý kerek. Ózim de sol salmaqqa shyqsam, keıbir jigittermen judyryqtasqym kelip ketedi. Qazir jasóspirimder men jastar arasynda jaqsy ósip kele jatqan boksshylar bar. Solardy der kezinde baıqap, júıeli túrde daıyndap, úlken sportqa beıimdeý qajet degen oı túıdim.
– Jaqynda ótken Azııa oıyndarynyń nátıjesine qatysty pikirińiz qandaı? Ulttyq quramanyń áleýetin eskere otyryp, qandaı máselelerge basymdyq bergen jón?
– Azııa oıyndaryndaǵy nátıjege de birden máz bolyp, bórkimizdi aspanǵa atyp qýanatyndaı jaǵdaıda emespiz dep oılaımyn. Biz ózimizge árdaıym syn kózben qaraýymyz kerek. Kemshilikter bar, olardy jasyrmaı, ashyq moıyndap, túzetýge kúsh salǵan jón.
– Aldaǵy ýaqytta ulttyq qurama jumysyna aralasyp, óz tájirıbeńizben bólisýge nıetti ekenińizdi aıttyńyz. Bul baǵyttaǵy naqty josparyńyz qandaı?
– Qazir ulttyq quramaǵa kelip, jattyqtyrýshylarmen, jeke bapkerlerimen óz oıymdy bólisip, kásipqoı boksta jınaǵan azdy-kópti tájirıbemdi ortaǵa salǵym keledi. Basty maqsatymyz – el chempıondarynyń deńgeıin kóterip, olardyń básekege qabilettiligin arttyrý. Osy baǵytta barlyǵymyz birlesip jumys atqaramyz degen oıdamyn.
– Áýesqoı jáne kásipqoı boks arasyndaǵy baılanysty nyǵaıtý qanshalyqty mańyzdy? Bul rette federatsııanyń qoldaýyn qalaı baǵalaısyz?
– Jigitterge tek sáttilik tileımin! Árdaıym qoldap, qastarynan tabylýǵa daıynbyz. Federatsııa basshylyǵy áýesqoı bokspen qatar, kásipqoı boksqa da kómektesip jatyr. Ol kisilerge alǵysymdy bildiremin.
«Jumyla kótergen júk jeńil» deıdi ǵoı. Sondyqtan aýyzbirshilikte bolyp, bir-birimizge qoldaý kórseteıik. Abaı atamyz aıtqandaı: «Birińdi, qazaq, biriń dos, kórmeseń istiń bári bos». Árdaıym osy ustanymdy berik ustaıyq.
– Áńgimeńizge raqmet!
