Qanat Islam - Djeıms Kırklend jekpe-jegi ótetin kún belgili boldy
ASTANA. QazAqparat - Atalǵan jekpe-jek 9 qyrkúıek kúni Astanada ótedi degen jospar bar. Boks keshi EKSPO kórmesi aıasynda uıymdastyrylady. Osyǵan oraı, búgin Qanat Islamnyń ózi jáne onyń bapkeri Nelson Lopes baspasóz máslıxatyn ótkizdi, dep xabarlaıdy QazAqparat tilshisi.
«Qurmetti Qazaq eli, men óte qýanyshtymyn. Árbir jekpe-jekte qoldaý bildiresizder. Sol úshin sheksiz alǵysymdy bildiremin. «Elim deıtin, erim deıtin» el aǵalarynyń baryna rızamyn. Elim deıtin erlerdiń bolatyny zańdylyq. Ol - atam zamannan qazaq tarıxynda bar nárse. Sondyqtan osyndaı táýelsiz elimiz bar kezde, kóteretin Týymyz bar kezde sharshy alańda elimizdi búkil álemge tanytý, ultymyzdyń myqtylyǵyn kórsetý - bizdiń, er azamattardyń mindetimiz. Aldaǵy jekpe-jekte Qazaq eliniń abyroıyn barsha álemge kórsetip, azamattyq boryshymyzdy taǵy da óteımiz dep oılaımyn», - deıdi Qanat Islam.
Boksshynyń aıtýynsha, jekpe-jekke kirý bıletteriniń baǵasy ázirshe belgisiz. Oǵan qosa, Djems Kırklendpen aradaǵy kelissózder áli aıaqtalǵan joq. "Ol kelisimge óz qolyn qoıǵan joq. Jaqyn arada naqty sheshimin aıtady", - dep atap kórsetti ol.
Qazaqstandyq boksshy Qanat Islam men amerıkalyq Djeıms Kırklend Astanada jekpe-jek ótkizýi múmkin degen málimet jarııalandy . Artynan ǵalamtorda Kırklendtiń Qanat Islam ótkizgen bir jekpe-jekti kórip otyrǵany týraly vıdeo da taraǵan bolatyn.
