Qanat Islam dopıng daýyna ilikken jekpe-jek sheberi Ospanovqa qoldaýyn bildirdi
ASTANA. QazAqparat - Qanat Islam erejesiz jekpe-jektiń qas sheberi Arman Ospanovqa aǵalyq qoldaýyn jetkizdi, dep habarlaıdy QazAqparat tilshisi.
Bul týraly ol Instagram áleýmettik jelisindegi óz paraqshasynda jazdy.
«Arman, sen qazaqtyń batyrysyń! Sen chempıonsyń! Ony qanshama ret dáleldediń. Álemdik dodalarda el namysyn qorǵadyń, kók týdy jelbirettiń. Qazaqtyń judyryǵy aýyr, jigeri myqty, namysty ult ekenin moıyndatqan jaýjúrek sportshysyń. Rıng syrtynda da kúres bar. Bul aıqasta da jaýyrynyń jerge tımeıtinine senemin. Shyn myqtyǵa túrli synaqtar keledi. Bul jerde de qasqaıyp turyp berý kerek. Bul jerde de eńseni tik ustaý kerek. Moıymaý kerek. Álemdik arenada áli de ulttyń abyroıyn asqaqtatyp, týyn jelbiretý úshin saǵan bul synaqty da jeńý - mindet. Óziń úshin emes, artyńnan erip kele jatqan, eliktep júrgen inileriń úshin, ultyńnyń keleshegi úshin saǵan toqtamaý kerek. Álsizder ǵana ár sózge alańdap, kim ne dep jatyr dep jaltaqtap júredi. Suńqar bıikte samǵaıdy. Sen batyrsyń. Ózińniń ornyń bar. Ony eshkimge berme! Myqty ekenińdi áli talaı dáleldeısiń. Ol kún de alys emes! Men saǵan senemin!», - dep jazady Qanat Islam.
Eske salaıyq, keshe erejesiz jekpe-jekten WSOF birinshiligi óziniń 35-shi týrnırinde óner kórsetetin sportshylardyń tizimin shyǵardy. Ókinishke qaraı, Arman Ospanov pen Stıven Rodrıgez arasyndaǵy jekpe-jek bul keshke kirmeı qaldy. Oǵan Arman Ospanovtyń qanynan tabylǵan dopıng sebep bolypty. WSOF basshysy Reı Sefonyń aıtýynsha, Marokko elinde ótken əskerı sambodan əlem birinshiliginen keıin atalmysh sportshymyzdyń qanynan tabylǵan dopıng jáne onyń 4 jylǵa sporttan shettetilgeni nazarǵa alynǵan.
Osy máselege baılanysty birinshi orta salmaqtaǵy WBO Intercontinental jáne WBA Fedelatin tujyrymdarynyń chempıony Qanat Islam Arman Ospanovqa qoldaý bildirip, sportshymyzdy jigerlendirdi.
