Qanat Islam: Brendon Kýkke qarsy daıyndyqty bastap kettim
ASTANA. QazAqparat - Belgili qazaqstandyq boksshy Qanat Islam aldaǵy jekpe-jegine baılanysty daıyndyǵy týraly aıtyp berdi, dep habarlady QazAqparat tilshisi.
«Astanada aldyda ótetin jekpe-jegimde kanadalyq boksshy Brendon Kýkpen judyryqtasatyn boldym. Qarsylastyń osaly bolmaıdy. Sondyqtan daıyndyqty barynsha kúsheıtýge bet burdym. Qazirgi tańda aıqasqa daıyndyqty bastap kettim. Sátin salsa, Alataý bókterinde tamyzdyń ortasyna deıin jattyǵýymdy jalǵastyramyn. Ary qaraı sońǵy daıyndyqty elorda tórinde ótkizemin. Bul el esinde qalatyn qyzyqty kezdesý bolady degen úmittemin», - dep atap ótti Qanat Islam.
Esterińizge sala keteıik, osyǵan deıin otandasymyzdyń Astanada kimmen judyryqtasatyny týraly aıtqan bolatynbyz. Qanat Islam 9 qyrkúıekte kanadalyq Brendon Kýkpen judyryqtasady. 31 jastaǵy qarsylasy búginge deıin kásipqoı boksta 18 jekpe-jek ótkizip, barlyǵynda jeńiske jetken. Onyń 11-inde jekpe-jekti ýaqytynan buryn aıaqtaǵan. Sońǵy jekpe-jegin ol otandasy Stıven Batlerge qarsy ótkizip, ýaqytynan buryn jeńgen.
Al Qanat Islam kásipqoı boksta 24 ret aıqasqa shyǵyp, barlyǵynda jeńiske qol jetkizdi. Onyń 19-y merziminen buryn aıaqtalǵan.
