Qanat Islam: Bizge jastar qarap otyrǵandyqtan, árbir sózimiz, júris-turysymyz biz úshin úlken jaýapkershilik
ASTANA. QazAqparat - Birinshi orta salmaqtaǵy WBO Intercontinental jáne WBA Fedelatin tujyrymdary boıynsha Álem chempıony, kásipqoı boksshy Qanat Islam Mádenıet jáne sport mınıstri Arystanbek Muxamedıulyna óziniń qoltańbasy qoıylǵan bylǵary qolǵapty syıǵa tartty, dep xabarlaıdy QazAqparat.
"Tek jumys isteý kerek, alda úlken jekpe-jekter bar, úlken maqsattar bar. Osy berip jatqan baǵalaryńyz men úshin alda úlken bir syn, jaýapkershilik. Artymnan ergen jastarǵa jol kórsetý, bizge qarap, eliktep ósedi ǵoı. Sol úshin árbir jerdegi sózimiz, júris-turysymyz biz úshin úlken jaýapkershilik. Aldaǵy jekpe-jekterde taǵy da elimizdiń, Elbasymyzdyń úmitin aqtaımyz degen oıdamyn", - dedi ol kezdesý barysynda.
"Bizge Qazaqstanda kóp nárseni birinshi ret isteýge múmkindik týyp jatyr. Sol úshin óte baqyttymyn. Óıtkeni bir jekpe-jektiń ózin Elbasy bolyp quttyqtap jatyr. Búkil el úshin, jastar úshin Táýelsizdik pen Elbasy degen bir uǵym bizge. Óıtkeni qanshama sportzaldar salynýda. Qanshama shetelde júrmiz, mundaı sport keshenderin áli kórmedik. Almatyda meniń jekpe-jegimniń ózin kórip, sen Las-Vegasta jekpe-jek ótkizdiń be dep suraıdy. Sengisi kelmeıdi de. Sebebi olar Qazaqstan deseńiz Aýǵanstanmen, túrli "standarmen" shatastyrady. Al anandaı jekpe-jekterdi kórip, olar tań qalady. Biz ol jerge birdeńe tabaıyq dep emes, óz elimizdiń abyroıyn kótereıik, óz elimizben maqtanaıyq, Týymyzdy kótereıik dep, sondaı armanmen bardyq. Osy jekpe-jekterdiń barlyǵy sátti ótip jatyr. Eń birinshiden, Elbasymyzǵa raxmet, osyndaı qoldaý jasap jatqanyna. Ózderińiz qabyldap, "erim deıtin el bolsa, erdiń baǵy janǵany" deıdi, sol úshin sondaı baqyttymyn men", - dep túıdi sózin Qanat Islam.
Aıta keteıik, 18 aqpanda Ýılmıngton qalasynda (AQSh, Delaver shtaty) WBO Intercontinental jáne WBA Fedelatin tujyrymdary boıynsha Álem chempıony, birinshi orta salmaqtaǵy Qanat Islam (22-0-0, 19 KO) brazılııalyq Robson Assısti (17-4-0, 9 KO) birinshi raýndta jeńgen bolatyn.
Álemge «Qazaq» degen atpen tanylǵan Qanat Islamnyń bul kásipqoı rıngtegi 23-shi kezdesýi edi.
