Qanat Islam: Beıbittiń bokstan ketýi ókinishti
ASTANA.QazAqparat - Birinshi orta salmaqtaǵy tanymal kásipqoı boksshy Qanat Islam búgin Astanada ótken baspasóz máslıhatynda Beıbit Shúmenovtiń bokstan ketýi týraly óz pikirin bildirdi, dep habarlaıdy QazAqparat.
«Qatty tańǵaldym. Sportshy úshin óte ókinishti jaǵdaı. Dosym retinde júregim aýyrady, janym ashıdy. Naqty sheshim emes shyǵar dep úmittenemin. Aldaǵy kúnderi Beıbittiń óz aýyzynan estimeı, sene almaımyn», - dedi Qanat.
Aıta keteıik, otandasymyz Astanadaǵy EKSPO-2017 kórmesi aıasynda 9 qyrkúıekte kezekti jekpe-jegin ótkizýdi josparlap otyr. Onyń kelesi qarsylasy - AQSh boksshysy Djeıms Kırklend bolýy múmkin.
Eske sala keteıik, buǵan deıin jartylaı aýyr salmaqtaǵy qazaq boksshysy Beıbit Shúmenov 19 maýsymda búkilálemdik boks qaýymdastyǵynyń (WBA) sheshimi boıynsha jartylaı aýyr salmaqtaǵy WBA álem chempıony tıtýlynan aıyryldy. Sol kúni Beıbit jattyǵýda alǵan jaraqatyna baılanysty bokstan ketetini belgili boldy.
