Qanat Islam: Aıqasqa tas-túıin daıynbyz
ASTANA. QazAqparat - Astanadaǵy «Saryarqa» velotreginde qazaq boksshysy Qanat Islam men kanadalyq Brendon Kýktyń qatysýymen keńeıtilgen baspasóz máslıhaty ótti, dep habarlaıdy «QazAqparat» HAA tilshisi.
Baspasóz máslıhatyna barlyq qazaqstandyq boksshylary men olardyń qarsylastary jınalǵan. Jıynǵa Qanattyń qarsylasy Brendon Kýk pen onyń jattyqtyrýshysy Maık Gaıet, promoýteri Taıler Brakston da keldi. Óz kezeginde Qanat Islam aıqasqa daıyn ekenin aıtyp ótti.
«Qazaqstanda ekinshi márte jarys ótkizip jatyrmyn. Birinshi márte aıqasym Almatyda ótse, elordada tuńǵysh ret sharshy alańǵa shyǵamyn. Barlyǵy Táýelsizdigimizdiń arqasy dep oılaımyn. Barlyq demeýshilerge rahmet! Táýelsiz eldiń er-azamattary el namysyn qorǵaǵaly otyrmyz. Maqsatymyz - tek qana elimizdiń abyroıyn kóterý, elge jeńis syılaý, qazaq ultynyń rýhynyń myqtylyǵyn búkil álemge kórsete bilý. Aıqasqa tas-túıin daıynbyz. Osy maqsatta qanshama aıter tóktik. Tek buǵan ǵana emes, aldymyzda kútip turǵan jekpe-jekterdiń barlyǵyna daıynbyz», - dedi Qanat Islam.
Baspasóz máslıhaty barysynda sóz berilgen Qanattyń qarsylasy Brendon Kýk «aryq sóılep, semiz shyǵýǵa» bel sheshken sekildi. Aldaǵy kezdesýge qatysty tilshilerdiń suraǵyna «Bárin de rıng kórsetedi» dep qysqa qaıyrdy.
Eske sala ketsek, Qanat Islam men kanadalyq Brendon Kýktyń aıqasy 9 qyrkúıek kúni «Saryarqa» velotreginde ótedi. Boks keshinde Jańqosh Turarov, Jánibek Álimhanuly, Meıirim Nursultanov, Rýslan Myrsataev, Álı Ahmedov, Aıdos Erbosynuly, Dımash Nııazov pen Rýslan Jańabaev sharshy alańǵa shyǵady.
Boks keshine bıletti Zakazbiletov.kz jáne BiletAstana.kz saıty nemese «Kerýen» SOSO, «Mechta» SO, «Astana Arena» SK-degi kassalaradan alýǵa bolady. 8 qyrkúıek kúni saǵat 13:00-de «Han shatyr» saýda ortalyǵynda osy jarysqa qatysatyn barlyq boksshylar juby salmaq ólsheý rásiminen ótedi.
