Qanat Islam álemdegi eń myqty kompanııalardyń birimen kelisimshartqa otyrmaq
ASTANA. QazAqparat - Qanat Islam álemdegi eń myqty kompanııalardyń birimen kelisimshartqa otyrmaq. Bul týraly keshe «Habar» telearnasynyń «Kózqaras» baǵdarlamasynda qonaqta bolǵan belgili kásipker Baýyrjan Ospanov málim etti.
Baǵdarlamany júrgizýshi Irak Elekeev Baýyrjan Ospanovqa kóptegen sportshylarǵa qoldaý kórsetip júrgenine alǵysyn aıta kelip, Qanat Islam týraly «Qazir Qanat Islam qaıda? Qashan álem chempıony bolady? Chempıondyq ataqtyń aýyly qanshalyqty alys?» degen el kókeıinde júrgen saýaldardy qoıǵan edi. Osy oraıda Baýyrjan Ospanov Qanat Islam týraly jaǵymdy jańalyǵymen bólisti.
«Ol - qazaqtyń ultshyl azamaty. Alla taǵala talantty ár qyrynan bere salǵan azamat. Men Qanattyń otbasy, januıasyn jaqsy bilemin. Úlgili otbasynda týǵan, ónegeli azamat. Elim-jerim degende janyn berýge daıyn azamat. Onyń aqyl-oıy, kúsh-qabileti bir emes, birneshe márte álem chempıony bolýǵa jetedi. Sondaı-aq sol ataqty qorǵap tura alatyn azamat. Ókinishtisi, Qanat elimizge kishkene jaıyraq kelip qaldy. Biraq, onyń jeńisti joldary alda. Búgin aıtpaı tura turaıyn, Qanat Islamnyń aldaǵy básekelerine baılanysty osy 3-4 kúnniń ishinde álemniń eń myqty kompanııalarynyń birimen kelisimshartqa qol qoıylady. Sodan keıin Qanat ári qaraı keminde eki aıda bir ret jarysqa shyǵatyn bolady. Jeńiske bastaıtyn úlken jol ashylady. Kóp uzamaı Qanatpen qaıta qaýyshyp, bir-eki aıda jetistikterin estıtin bolasyzdar», - dep atap ótti Baýyrjan Ospanov.
Kúnsultan Otarbaı
