Qanat Islam Aqtóbedegi kásipqoı boks keshine qatysady
Aqtóbege álemniń úzdik boksshylary jınalady. Boks keshine WBA Inter-Continental jáne WBO NABO tıtýlynyń ıegeri Qanat Islam, WBA nusqasy boıynsha álem chempıony Janat Jaqııanov, bokstan Olımpıada chempıony Baqtııar Artaev jáne Olımpıada oıyndarynyń eki dúrkin kúmis júldegeri Ádilbek Nııazymbetov qatysady dep josparlanǵan. Aqtóbe oblystyq dene shynyqtyrý jáne sport basqarmasy bul sharany «TUKESHOV BOXING PROMOTIONS» kompanııasynyń qoldaýymen uıymdastyryp otyr.
«Kásipqoı boks keshiniń qatysýshylary retinde Tájikstan, Reseı, Qyrǵyzstan, Belarýs, Ázerbaıjan, Fılıppın jáne Qazaqstan sportshylary bolady. Kórermender 11 tolyq jekpe-jekti tamashalaıdy. Sharshy alańda elimizdiń namysyn Ibragım Eskendir, Ýalıhan Bısenqulov, Arman Rysbek, Rýslan Myrsataev sondaı-aq, aqtóbelik Dastan Sadýuly men Medet Aıdos qorǵaıtyn bolady. Keshtiń basty jekpe-jeginde Bobyrjan Momynov WBC nusqasy boıynsha Azııa chempıonatynyń ataǵy men NBA nusqasy boıynsha Inter - Continental chempıony ataǵy úshin kúresedi. Ol fılıppındik Ibgos Janjessı Djýnıormen kezdesedi», - dedi basqarma basshysy Meırambek Mahambetov.
Aıta keteıik, Bobyrjan Momynov áýesqoı boksshylar arasynda álem, Qazaqstan chempıony, birneshe halyqaralyq týrnırdiń jeńimpazy. Ol AQSh-qa baryp jattyǵyp, kásipqoı boksta kózge tústi. Ótken jyly Saýl Alvares Gennadıı Golovkınmen kezdespes buryn, Bobyrjan Momynovpen judyryqtasyp, qazaqstandyqty komandasyna shaqyrǵan. Bobyrjan Momynov barlyǵy 8 jekpe-jek ótkizip, bárinde jeńiske jetti.