Qanat Islam AQSh-qa ketedi
ASTANA. 21 mamyr. QazAqparat - Boksshy Qanat Islam «Astana arlandarynyń» sapynan ketti. Bul týraly boksshy «Qamshy» portalyna bergen suhbatynda málimdedi, dep habarlaıdy «Alaman» sport agenttigi.
Endi Qanat kásipqoı boksqa den qoımaq. Jáne boksshy 1 jylǵa AQSh-tyń Maıamı qalasyna jattyǵýǵa attanbaq. «Alla qalasa, jaqynda Amerıkaǵa ketemin. Negizi «Astana Arlans» komandasymen bir jylǵa ǵana kelisim-shart jasalǵan. Sondyqtan byltyr Ázirbaıjanda ótken álem chempıonatyna «Astana Arlans» qurama komandasynyń múshesi retinde baratyn bolǵanmyn. Chempıonattyń ótýine bir apta qalǵan kezde qatyspaıtyndyǵymdy bilgennen keıin, komandadan ketý oıda boldy. Degenmen, jigitterdiń ótinishimen qazirge deıin júrdim. Endigi jerde kásipqoı bokstan Amerkıkada daıyndalamyn. Negizi 2008 jyldan beri usynystar kóp túsken. Qazir tıisti qujattarymdy daıyndaý ústindemin. Kezinde Marat Mázimbaev daıyndalǵan Maıamıge shamamen bir jylǵa barmaqpyn», - dedi boksshy óz suhbatynda.
