Qanat Bozymbaev saıasat sahnasyndaǵy salmaǵyna qatysty suraqqa ázilmen jaýap berdi

ASTANA. QazAqparat - Energetıka mınıstri Qanat Bozymbaev «saıasat sahnasyndaǵy salmaǵyńyzdy saqtap qalýyńyzdyń syry nede?» degen suraqqa jaýap berdi, dep habarlaıdy QazAqparat tilshisi.

«Kúshiń nede dep surasańyz, 100 keliden astam salmaǵym bar ekenin aıtqym keledi. Bálkim, saıası salmaǵymnyń sebebi osy shyǵar (kúldi). Qaljyńdaımyn. Jalpy aıtarym, eń bastysy eshqandaı qıyndyqtarǵa qaramastan, jumys istep, nátıjelerge qol jetkizip, kúndelikti strategııalyq sheshim qabyldaý kerek. Keıde sheshimder belgili bir deńgeıde qate bolýy da múmkin. Alaıda, basshylyq qoıǵan mindetter boıynsha alǵa jyljýymyz kerek.  Úkimettiń strategııalyq josparyn oryndaýǵa tıispiz», - dedi Qanat Bozymbaev OKQ-da ótken baspasóz máslıhatynda.

Energetıka mınıstri óz sózinde osy jyly ózi jetekshilik etetin vedomstvo strategııalyq jospardy 100 paıyz oryndaǵanyn atap ótti.

«Tipti keıbir kórsetkishter boıynsha artyq nátıjege qol jetkizdik. Sebebi, jumys jetkilikti deńgeıde josparlanǵan bolatyn. Naǵyz mamandardyń jumys istegeni óte mańyzdy. Baǵyma qaraı, Energetıka mınıstrliginde qarapaıym qyzmetkerden basshylarǵa deıin - naǵyz mamandardan quralǵan ujym qalyptasqan. Eger osy ujym bolmaǵanda, basshylyqtyń aldymyzǵa qoıǵan mindetterin oryndaı almaı, qazir aldaryńyzda turmas edim», - dep túıdi Qanat Bozymbaev.