Qanat Bozymbaev: Kómir óndirý qarqyny qalpyna keltirildi
ASTANA. QazAqparat - Aqpan aıynyń ortasyna deıin Qazaqstanda kómir óndirý qarqyny 100 paıyzdyq deńgeıde qalpyna keltiriletin bolady. Bul týraly búgin Úkimet otyrysynda QR Energetıka mınıstri Qanat Bozymbaev málim etti, dep habarlaıdy «QazAqparat» HAA tilshisi.
«Halyqty kómirmen qamtý máselesine qatysty aıtyp ótsem. Jedel aqparattarǵa sáıkes, 2018 jyldyń basynan bastap, 12,7 mıllıon tonna kómir óndirilgen. Ótken jyldyń sáıkes kezeńimen salystyrǵanda, bul kórsetkish 97 paıyzdy quraıdy. Kómir óndirýshi kásiporyndar 2018 jyldan bastap elektr stantsııalaryna 7,3 mıllıon tonna, halyqtyń kommýnaldyq-turmystyq qajettiligine 1,2 mıllıon tonna, ónerkásiptik kásiporyndarǵa 952 myń tonna, eksport úshin 3 mıllıon tonnaǵa jýyq kómir tıegen», - dep baıandady Qanat Bozymbaev Úkimet basshysyna.
Energetıka mınıstri kómir óndirýdegi 3 paıyzdyq artta qalý eń aldymen kúnniń sýyq bolýyna jáne kómir kenderindegi gıdravlıkanyń jumysyna baılanysty bolǵanyn atap ótti.
«Biraq, búgingi kúni kómirdi óndirý qarqyny qalpyna keldi. Bizdiń oıymyzsha, osy aıdyń ortasyna deıin kómir óndirý qarqynynyń 100 paıyzdyq kórsetkishine jetemiz», - deıdi ol.
Qanat Bozymbaev atalǵan máseleni rettep otyrý úshin qolǵa alynýy tıis jumys týraly aıtty.
«Kómirmen qamtý máselesin retke keltirý úshin Sizden jergilikti atqarýshy organdarǵa kómirdiń jetkizilýi men qory týrasynda táýlik saıyn aqparat berip otyrýdy júkteýińizdi suraımyz. Jergilikti atqarýshy organdarǵa kún saıyn aqparat berip otyrýdy mindetteýińizdi ótinemiz. Odan ary qaraı biz kún saıyn júıelengen aqparatty osynda - Premer-Mınıstrdiń Keńsesine joldap otyrar edik», - dedi Bozymbaev.
