Qanat Bozymbaev: Qazaqstan OPEK kelisimindegi mindettemelerdi oryndap keledi

ASTANA. QazAqparat - QR Energetıka mınıstri Qanat Bozymbaev Qazaqstannyń munaı óndirisin azaıtý týraly OPEK kelisimi aıasyndaǵy barlyq mindettemelerin oryndap jatqanyn málimdedi, dep habarlaıdy QazAqparat tilshisi.

«Qazaqstan óz mindettemelerin atqaryp keledi. Ýáde bergenimizdeı, óndiris kólemin bir deńgeıde ustap otyrmyz. Bolar-bolmas qana kólemde óndiristiń belgilengen shekten asyp ketýi oryn aldy. Ótken jyly táýligine ortasha eseppen 1 mln 720 myń barrel munaı óndirdik. Shyn máninde, táýligine 1 mln 680 myń barrel munaı óndirýimiz kerek edi. Táýligine 35-40 myń barrel - tipti Qazaqstan deńgeıinde bolmashy ǵana kórsetkish», - dep málimdedi jýrnalısterge mınıstr Úkimette ótken baspasóz máslıhatynda.

Mınıstr máseleniń baıybyna barmaıtyndar ǵana «Qazaqstan óz mindettemelerin oryndamaı jatyr» dep habar taratatynyn atap ótti.

Sondaı-aq, Qanat Bozymbaev «OPEK+» kelisiminiń uzartylǵanyn, ondaǵy sharttardyń anaǵurlym jeńildetilgenin habarlady.

«Qazaqstan OPEK+ kelisimi aıasynda óz mindetterin jalǵastyra beredi», - dep tolyqtyrdy mınıstr.