Qanat Bozymbaev: Qazaq kúresin damytý strategııasy qabyldanady
ASTANA. QazAqparat - Qazaq kúresi halyqaralyq qaýymdastyǵy jaqyn aılardyń ishinde Qazaq kúresin damytý strategııasyn qabyldamaq. Bul týraly Qaýymdastyq prezıdenti Qanat Bozymbaev aıtyp berdi, dep habarlaıdy QazAqparat tilshisi.
«Búgingi tańda Qazaq kúresi - fanattar men tarıh taǵylymyn joǵary qoıatyn patrıottardyń qoldaýymen alǵa basyp keledi. Qazaq kúresinen qanshama jyldan beri iri saıystar ótkizilip jatqanymen, naqty damytý strategııasy joq bolatyn. Federatsııanyń atqarýshy komıtetiniń múshelerimen birge erteń strategııanyń josparyn talqylaǵaly otyrmyz. Aldaǵy birneshe aıda Qazaq kúresin damytý strategııasyn qabyldaımyz. Bul rette ásirese Koreıa men Japonııanyń tájirıbelerine súıensek dep otyrmyz. Bizdiń federatsııa bir jyldyń ishinde 20 músheni qabyldap úlgerdi. Taǵy úsh-tórt memleketke kezek kelgeli tur. Bizdiń federatsııa geometrııalyq progressııamen óser degen senimdemiz», - dedi Qanat Bozymbaev OKQ-da ótken baspasóz máslıhatynda.
Eske sala ketsek, buǵan deıin 26 tamyzda Astanada «Dáýlet» sport kesheninde Qazaq kúresinen Azııa chempıonaty ótetinin habarlaǵan bolatynbyz. Chempıonatqa 11 memleketten 77 sportshy qatyspaq.
