Qanat Bozymbaev qazaq kúresi federatsııasynyń qurmetti prezıdenti bolyp saılandy
ASTANA. QazAqparat - Qazaq kúresi federatsııasynyń qurmetti perzıdenti bolyp QR energetıka mınıstri Qanat Bozymbaev saılandy. Bul týraly búgin Astanada ótken baspasóz máslıhatynda «Qazaqstan Barysy» Damý qorynyń qamqorshylar keńesiniń tóraǵasy Arman Shoraev málimdedi.
«Ol (Q. Bozymbaev - red.) federatsııa qurylǵan sátten bastap qolynan kelgenshe járdem berip keledi. Onyń qoldaýymen 2013 jyly «Eýrazııa Barysy» halyqaralyq týrnıri ótti. Jarys úsh ret uıymdastyrylyp, oǵan 12 elden palýandar kelip qatysty. Pavlodarda 35 elden kelgen palýandardyń qatysýymen «Álem Barysy» jarysyn ótkizdi. Osyǵan baılanysty federatsııa basshylyǵyna mundaı adamdardyń kelýi ulttyq kúrestiń odan ári damýyna yqpal etetin bolady», - dep atap ótti A.Shoraev.
Eske salsaq, «Qazaqstan Barysy» damý qory» qazaq kúresi boıynsha jalpyulttyq týrnır ótkizý úshin 2010 jyly qurylǵan.
Basty maqsaty - qazaq ulttyq kúresin memlekettik deńgeıdegi buqaralyq sport túri retinde damytý. Basqasha aıtqanda, joba ulttyq sport ónerin órkendetý arqyly jas urpaqty patrıottyq tárbıeleýge yqpal etedi.
Federatsııanyń qurmetti prezıdenttigine saılanǵan Qanat Bozymbaev Federatsııanyń atqarý komıtetine alǵys aıta otyryp, artqan úmit pen senimdi aqtaýǵa daıyn ekendigin bildirdi. Sondaı-aq, óz jumysynyń bastamasy retinde bıylǵy jyly qazan aıynda Astana qalasynda qazaq kúresinen Álem Chempıonatynyń uıymdastyrylatynyn habarlady. Sonymen birge, «Expo-2017» búkilálemdik halyqaralyq kórmesi aıasynda qazaq kúresinen kezekti «Álem Barysy» týrnıriniń ótkiziletindigin jarııa etti.
