Qanat Bozymbaev: Ekologııa mınıstrligin qurý durys sheshim boldy

NUR-SULTAN. QazAqparat -QR Energetıka mınıstri Qanat Bozymbaev jańadan qurylǵan Ekologııa, geologııa jáne tabıǵı resýrstar mınıstrligine qatysty pikirin bildirdi, dep habarlaıdy QazAqparat tilshisi.

«Tabıǵı resýrstar shoǵyrlanǵan bólek vedomstvo qurý týraly sheshim qabyldandy. Geologııa jerdi zertteý týraly ǵylym, sondaı-aq vedomstvoda qorshaǵan ortany qorǵaý máselesi qamtylǵan. Bul óz kezeginde óte durys sheshim boldy dep sanaımyn», - dedi mınıstr Parlament Májilisinde tilshiler saýalyna jaýap bere otyryp.

Osy oraıda ol ekologııa máseleleri buǵan deıin Energetıka mınıstrliginiń quzyretinde bolǵanyn eske saldy.

«Qazirgi kezde bólek memlekettik vedomstvonyń qurylýy durys sheshim ekenin atap ótkim keledi. Bul mınıstrlik qorshaǵan ortany qorǵaý máselelerin qadaǵalaıdy», - dedi Bozymbaev.

Onyń paıymynsha, jańa vedomstvo qadaǵalaıtyn salalardy damytýda tyń serpin bolady.

«Ekonomıka men qoǵam damýynyń árbir kezeńinde memlekettik basqarýdyń ózindik organdar konfıgýratsııasy bolýy kerek», - dedi Energetıka mınıstri.

Budan buryn habarlanǵandaı, Qanat Bozymbaev jańa mınıstrlikke basshy retinde taǵaıyndalǵan óziniń burynǵy orynbasary Maǵzum Myrzaǵalıevke qatysty pikir bildirdi.