Qanat Bozymbaev bıyl elimizde qansha tonna munaı óndiriletinin aıtty

ASTANA. QazAqparat - Aǵymdaǵy jyly 89 mln tonna deńgeıinde munaı óndirý josparlanýda. Bul týraly búgin QR Energetıka mınıstrliginiń keńeıtilgen alqa májilisinde vedomstvo basshysy Qanat Bozymbaev aıtty, dep habarlaıdy QazAqparat tilshisi.

«2018 jyly otyn-energetıka kesheniniń ár salasy boıynsha kórsetkishter tolyq oryndalyp, rekordtyq nátıjelerge qol jetkizdik dep aıtýǵa bolady. Munaı óndirý salasy elimizdiń tarıhynda bolmaǵan 90 mln 360 myń tonna kólemine jetti. Bul 2017 jylǵa qaraǵanda 4,8 paıyzǵa artyq»,- dedi mınıstr.

Bul rette onyń dereginshe, mundaı joǵary kórsetkishke Qashaǵannan 13,2 mln tonna, Teńizden 28,6 mln tonna jáne Qarashyǵanaqtan 2,2 mln tonna munaı óndirýdiń arqasynda qol jetkizilip otyr.

«Aǵymdaǵy jyly 89 mln tonna deńgeıinde munaı óndirý josparlanýda. Bul rette eki satydaǵy ken oryndarynyń óndirý kólemi tabıǵı quldyraýmen baılanysty bolyp otyr. Ásirese, Qyzylorda oblysyndaǵy Qumkól tobynda 2019 jylǵa josparlanǵan óndiris kólemi 1 mln tonnaǵa tómendeıdi», - dedi ol.

Qanat Bozymbaevtyń aıtýynsha, munaı óndirisiniń tabıǵı túrde tómendeýin toqtatý múmkin emes.

«Degenmen, tómen qarqyndy óndirý kólemin birqalypta ustap turý úshin tıisti sharalar jasalýda», - dedi mınıstr.