Qanat Bozymbaev benzın baǵasyna boljam jasady
ASTANA. QazAqparat - Qazan-qarasha aılarynda AI-92 markaly benzınniń baǵasy 160-161 teńge bolýy tıis. Mundaı boljamdy búgin Úkimettiń selektorlyq rejimdegi otyrysynan keıin BAQ ókilderine suhbat bergen QR Energetıka mınıstri Qanat Bozymbaev jasady, dep habarlaıdy QazAqparat.
«Reseılik benzın qazaqstandyqqa qaraǵanda qymbat. Sondyqtan onyń Qazaqstandaǵy baǵasy 171 teńge bolýy múmkin. Sondyqtan biz iri jelilik kompanııalarmen olar baǵany teńestirýi úshin ımport kólemi teń benzın berip otyramyz dep ýaǵdalastyq. Qazan aıynyń sońy men qarasha aıynyń basynda ortasha baǵasy lıtrine 160-161 teńge bolýy tıis dep sanaımyz», - dedi Qanat Bozymbaev.
Sonymen qatar ol kórshi elderden benzın ımporttaý qajettigine baılanysty janarmaıdyń elimizdegi baǵasy joǵary bolyp otyrǵandyǵyn basa aıtty.
«Baǵa joǵary. Biraq, bul ósim bolmasa Qazaqstanǵa benzın ákele almaımyz. Qazanda reseılik benzınniń úlesi shamamen 40 paıyz bolsa, qarashada biz ony 30, al jeltoqsanda 20 paıyzdan tómendeıdi dep boljap otyrmyz», - dedi mınıstr.
Munan bólek, Bozymbaev taıaý ýaqytta elimizde benzın tapshylyǵy bolmaıtyndyǵyna sendirdi.
«Atyraý men Shymkenttegi eki iri munaı óndeý zaýytymyz jáne «Kondensat» AQ AI-92 markaly benzınniń 170 myń tonnasyn óńdiredi dep boljap otyrmyz. Buǵan qosa, iri kompanııalar reseılik munaı kompanııalarymen 100 myń tonnadan astam benzın alýǵa shart jasasty»,- dedi ol.
