Qanat Bozymbaev Jańaózendegi jumysshylar máselesin sheshýge qatysty pikir bildirdi

ASTANA. KAZINFORM – Premer-Mınıstrdiń orynbasary Qanat Bozymbaev «Ózenmunaıgaz» kompanııasyna qarasty Burǵylaý basqarmasynyń ereýilge shyqqan jumysshylaryna qatysty jaǵdaıǵa pikir aıtty.

Búgin Parlament Májilisinde tilshiler Jańaózendegi munaıshylardyń narazylyǵy jaıynda suraq qoıdy.

«Bul másele meniń quzyretime jatpaıdy, biraq ol jaıynda habardarmyn. Konstıtýtsııaǵa sáıkes ár adam óz quqyǵyn qorǵaýy tıis. Sondyqtan osy jaǵdaıda zańdy ári zańsyz máselelerdi qaraý kerek. Ekinshiden, naqty qandaı talaptar qoıyp otyrǵanyn qarastyrý qajet. Bul turǵyda osy talaptardyń qanshalyq ádil ekenine nazar aýdarǵan jón. Osy máselelerge «QazMunaıGaz» kompanııasy belsendi túrde aralasýy tıis. Olarda tıisti algorıtm bar ekenin bilemin. Sodan keıin kelesi deńgeıde ony mınıstrlik qaraýy kerek (Energetıka mınıstrligi)», - dedi Q.Bozymbaev.

Budan buryn habarlanǵandaı, jaqynda «QazMunaıGaz» «Ózenmunaıgaz» kompanııasynda qalyptasqan jaǵdaıdy túsindirdi.

22 qarasha kúni «Qazmunaıgaz» kompanııasynyń basqarma tóraǵasy Ashat Hasenov «Ózenmunaıgaz» kompanııasyna qarasty Burǵylaý basqarmasynyń ereýilge shyqqan jumysshylary qashan tolyq jumysqa oralatynyn aıtty.