Qanat Bozymbaev Jańaózendegi strategııalyq mańyzy bar kásiporyndarmen tanysty
ASTANA. KAZINFORM – Premer-Mınıstrdiń orynbasary Qanat Bozymbaev Mańǵystaý oblysyna jumys sapary barysynda Prezıdenttiń eldiń batys óńirlerin áleýmettik-ekonomıkalyq damytýdyń shuǵyl sharalar jıyntyǵyn ázirleý jónindegi tapsyrmalarynyń oryndalý barysyn tekserdi. Bul týraly Úkimettiń baspasóz qyzmeti habarlady.
Vıtse-premer halyqty aýyz sýmen qamtamasyz etetin qalalyq «Ózen» sý tazartý nysanynyń jumysymen tanysty. Óndiris kólemin ulǵaıtý jáne turǵyndardyń suranysyn qanaǵattandyrý úshin 2025 jyly 30 myń tekshe metr sý jınaýǵa arnalǵan rezervýar salý týraly sheshim qabyldandy.
«Jaz mezgilinde Jańaózen qalasynyń turǵyndary taza aýyz sý tapshylyǵyna tap bolady. Bul máseleni shuǵyl sheshý kerek. Ákimdikke kelesi jazǵa deıin rezervýarlar salyp, ony iske qosýdy qarjylandyrýdy qarastyryp úlgerý úshin qarasha aıynyń sońyna deıin qajetti jobalaý-smetalyq qujattamany ázirleýdi tapsyramyn», — dedi Qanat Bozymbaev.
Sondaı-aq vıtse-premer Jańaózen qalasynda sýmen jabdyqtaý (21,1 km) jáne sý burý (21,9) jelilerin rekonstrýktsııalaýmen jáne keńeıtý jumystarymen tanysty. Bıylǵy jyly «Shańyraq», «Shuǵyla», «Astana», «Mamyr» jáne «Temirjol vokzaly» shaǵyn aýdandaryndaǵy jumystar aıaqtalady. Al 2025 jyly qalada káriz tazartý qurylysyn qaıta jańartý isi bastalady.
Osy jyldyń jeltoqsan aıynda qýattylyǵy táýligine 50 000 m3 sý tushytatyn zaýyttyń qurylysy bastalyp, 300 jumys orny ashylady.
Sondaı-aq jumys sapary aıasynda vıtse-premer «Qazaq gaz óńdeý zaýyty» JShS-ine bardy. Onda 700-den astam adam eńbek etedi. Zaýyt jylyna 1,5 mlrd tekshe metr shıki gazdy óńdeıdi. Kásiporyn aýmaǵynda jańa gaz óńdeý zaýyty salynýda, ol 2027 jyly iske qosylyp, qosymsha 700 turaqty jumys orny ashylady dep josparlanyp otyr.
Budan bólek, Jańaózende sorǵy-kompressorlyq qubyrlar men sorǵy shtangalaryn shyǵaratyn zaýyt qurylysy júrip jatyr, bul qosymsha 250 turaqty jumys ornyn qurýǵa múmkindik beredi.
Mańǵystaý oblysynda Qazaq Gaz kompanııasy túrik ınvestory Esta Construction-men birlesip, 400 adamdy turaqty jumyspen qamtamasyz etetin karbamıd pen ammıak óndiretin zaýyt salýdy josparlap otyr.
Jumys sapary aıasynda Qanat Bozymbaev «Ózenmunaıgaz» AQ-ǵa bardy. Kompanııa basshylyǵyna «Ózen» jáne «Qaramandybas» ken oryndaryn ońaltý jobasyna sáıkes, munaı óndirý kólemin ulǵaıtý tapsyryldy.
