Qanat Bozymbaev SQO-da sý tasqynynan keıin qalpyna keltirý jumystaryn tekserdi
PETROPAVL. KAZINFORM — QR Prezıdentiniń tapsyrmasy boıynsha vıtse-premer Soltústik Qazaqstan oblysynda sý tasqynynan keıin qalpyna keltirý jumystaryn tekserdi. Qanat Bozymbaev Qyzyljar aýdanynda, sondaı-aq Petropavldaǵy Podgora jáne Kojevnyı shaǵyn aýdandarynda boldy.
Jergilikti turǵyndarmen jáne kásipkerlermen kezdesý barysynda vıtse-premer ákimdikke birqatar tapsyrma berdi. Sonyń ishinde zardap shekken bızneske aıdyń sońyna deıin ótemaqy tóleý jáne úı máseleleri boıynsha halyq arasynda túsindirý jumystaryn júrgizý.
Soltústik Qazaqstan oblysy ákimi Ǵaýez Nurmuhambetovtyń aıtýynsha, Qyzyljar aýdanynda 1099 úı jóndelýde, 53 turǵyn úı satyp alyndy. Petropavlda ekinshi deńgeıli naryqta 302 páter satyp alyndy, 549 otbasyǵa turǵyn úıdi jóndeýge jáne qalpyna keltirýge ótemaqy tólendi.
Sondaı-aq Petropavl mańynda aýqymdy qurylys salyndy. Munda birneshe aıdyń ishinde jańa shaǵyn aýdan boı kóterdi. Oǵan «Birlik» ataýy berildi. 100 ga qurylys alańynda 1,5 myń adam jumys isteıdi. Shaǵyn aýdanda barlyǵy 700 tıptik úı bolmaq. Onyń 600 Kaspi, Kazakhmys jáne Kaz Minerals Management kompanııalarynyń qarajatyna salynyp jatyr. Beriletin úıler daıyn kúıde jergilikti «ZIKSTO» zaýytynyń demeýshiligimen qajetti jıhazdar men tehnıkamen qamtamasyz etilmek.
«Birlik» shaǵyn aýdanyndaǵy 100 úı paıdalanýǵa berildi. Vıtse-premer olardyń sapasyn tekserdi. Eki apta buryn 53 otbasy qonystandy. Búgin shaǵyn aýdanda taǵy da qonys toıy atap ótildi. Taǵy 47 otbasy jaqynda shaǵyn aýdannyń jańa turǵyndary bolmaq. Qanat Bozymbaev jańa úı ıelerin quttyqtady. Ol bul 100 úı «Qazaqstan halqyna» qoryna óz qarajatyn aýdarǵan qazaqstandyqtardyń esebinen salynǵanyn atap ótti.
«Birlik» shaǵyn aýdanynan páter alýǵa taǵy 500-ge jýyq otbasy ótinim berdi. Jańa shaǵyn aýdandaǵy turǵyndardyń sany shamamen 3 myń adam bolmaq. Bul aýdanda úılermen birge qajetti áleýmettik nysandar, balabaqsha jáne mektep salynyp jatyr.
