Qanat Bozymbaev Shyǵys Qazaqstan oblysyndaǵy sý tasqyny jaǵdaıyn tekserdi
ASTANA. KAZINFORM – Qanat Bozymbaev Shyǵys Qazaqstan oblysyna jumys saparymen bardy.
Qazirgi ýaqytta óńir aýmaǵynda taýly aımaqtardaǵy qardyń erýinen ekinshi sý tasqyny tolqyny ótip jatyr. Vıtse-premer sý tasqyny qaýpi joǵary ýchaskelerdi tekserdi.
Oblys boıynsha 2 qala men 11 aýdanda 72 sý tasqyny qaýpi bar eldi meken anyqtalǵan.
Júrgizilgen aldyn alý sharalarynyń nátıjesinde 15 eldi mekende tasqyn qaýpi joıylyp, 49-ynda qaýip azaıtyldy. Qazir 8 eldi meken áli de qaýip aımaǵynda, ol jerlerde táýlik boıy baqylaý uıymdastyrylǵan.
Oblys ákimdiginiń málimetinshe, 132 sý sharýashylyǵy nysany shtattyq rejımde jumys istep jatyr.
Qanat Bozymbaev Óskemen qalasyndaǵy Vtorýshka ózenindegi gıdrotehnıkalyq qurylysty jáne ózen sýyn sý burý arnasyna aıdaıtyn 1A sorǵy stantsııasyn tekserdi. Bul nysan mańaıdaǵy turǵyn úılerdi sý basýdan qorǵaıdy. Keıin vıtse-premer Zýbovsk aýylyndaǵy jaǵalaýdy nyǵaıtý dambasynyń jáne Buqtarma ózeniniń Maleevsk aýylyndaǵy gıdropostynyń jaǵdaıymen tanysty.
Óskemen qalasynda Qanat Bozymbaev oblystaǵy sý tasqyny jaǵdaıyn naqty ýaqyt rejıminde baqylap, boljaý júrgiziletin jedel basqarý ortalyǵynyń jumysymen tanysty. Munda sý tasqyny jaǵdaıy tsıfrlyq karta arqyly da baqylanady.
Vıtse-premer «Qazgıdromet» RMK men oblys ákimdigine salynǵan dambylar boıynsha istelgen jumystardy eskere otyryp, gıdroposttardaǵy shekti deńgeılerdi qaıta kalıbrleýdi jáne naqtylaýdy tapsyrdy.
Sondaı-aq, mamyr-maýsym aılarynda kútiletin úshinshi sý tasqyny tolqynyna daıyndyqty kúsheıtý jóninde barlyq tıisti qyzmetterge naqty tapsyrma berildi.
Aıta ketelik sý tasqyny qaýpi bar 3 oblys baqylaýǵa alyndy.