Qanat Bozymbaev Óskemen energetıkasynyń strategııalyq nysandaryn aralady
ASTANA. KAZINFORM- Shyǵys Qazaqstan oblysyna jumys sapary barysynda Premer-mınıstrdiń orynbasary qala turǵyndarynyń 80%-dan astamyn jylýmen qamtamasyz etetin Óskemen JEO-nyń jańǵyrtý jumystarymen tanysty, dep habarlaıdy Úkimettiń baspasóz qyzmeti.
Bıyl jóndeý jáne qurylys jumystaryna «Tarıfti ınvestıtsııaǵa aıyrbastaý» baǵdarlamasy aıasynda 7,5 mlrd teńge baǵyttaý josparlanǵan. Stansada 9 qazan agregaty men 8 týrboagregatty jóndeý jumystary júrgizilip jatyr, sondaı-aq Energetıka jáne kommýnaldyq sektorlardy jańǵyrtý ulttyq jobasy aıasynda stansany keńeıtý boıynsha jobalar iske asyrylýda.
Qanat Bozymbaev sonymen qatar 4 myńnan astam abonentti jáne birqatar ónerkásiptik kásiporyndy jylýmen qamtamasyz etetin Sogra JEO-ny aralady. Sońǵy úsh jylda munda jabdyqtyń tozý deńgeıi 63,25%-dan 61,87%-ǵa deıin tómendetildi. Bıyl jóndeý jumystary jalǵasady.
Budan bólek, Qanat Bozymbaev Jańa Sogra aýylynda salynyp jatqan sý tazartý nysandarynyń qurylysymen tanysty. Keshenniń táýliktik qýattylyǵy 13 050 m³ quraıdy.
Sapar qorytyndysy boıynsha vıtse-premer Tótenshe jaǵdaılar ortalyǵynda sý tasqyny kezeńi jáne órt qaýpi joǵary maýsymǵa daıyndyq máseleleri boıynsha keńes ótkizdi.
Osyǵan deıin Úkimettiń 2027 jylǵa qaraı statıstıkalyq esepterdiń sanyn 50% qysqartatynyn jazdyq.
