Qanat Bozymbaev Ortalyq Azııa elderin klımattyq syn-qater jaǵdaıynda sýdy ádil bólýge shaqyrdy
ASTANA. KAZINFORM — Premer-Mınıstrdiń orynbasary Qanat Bozymbaev Ortalyq Azııa elderiniń Memleketaralyq úılestirý sý sharýashylyǵy komıssııasynyń 90-shy otyrysyn ótkizdi.
Іs-sharaǵa Qazaqstan, Qyrǵyzstan, Tájikstan, Túrikmenstan, Ózbekstannyń salalyq jáne syrtqy saıasatqa jaýapty vedomstvolarynyń ókilderi, sondaı-aq halyqaralyq qarjy ınstıtýttary men damý uıymdarynyń ókilderi qatysty.
Atalmysh otyrys — óńirdegi transshekaralyq sý resýrstaryn strategııalyq basqarýdaǵy negizgi memleketaralyq organ. Búgingi otyrys kún tártibi agroklımattyq jaǵdaıdyń kúrdeliligine baılanysty aıqyndaldy jáne sý resýrstaryn ádil bólý jónindegi jedel máselelerge arnaldy.
Qanat Bozymbaev bıylǵy vegetatsııalyq kezeńniń asa kúrdeli jaǵdaıda ótip jatqanyn atap ótti. Aldaǵy jyldary kútiletin klımattyq ózgeris pen sý tapshylyǵy Ortalyq Azııa elderinen úılestirilgen áreketter men qol jetkizilgen ýaǵdalastyqtardy qatań saqtaýdy talap etedi.
— Shardara sý qoımasyndaǵy sý kólemi kópjyldyq ortasha deńgeıden tómendedi. Bul — jaı ǵana kórsetkish emes, aǵys tómengi bóligindegi sý qamtamasyz etilýine tóngen naqty qaýip. Ókinishke qaraı, osy komıssııa aıasynda qabyldanǵan sheshimder tolyq kólemde oryndalmaı otyr, bul óz kezeginde sý rejımderin retteýde eleýli qıyndyqtar týǵyzýda. Ýaqyt bizden anaǵurlym jyldam áreket etýdi talap etedi. Biz tek talqylap, josparlap qana qoımaı, naqty sharalar qabyldaýymyz qajet. Seriktestigimiz senim men ózara túsinistik rýhynda damı beredi dep senemin, al birlesken jumys elderimiz ben búkil óńir úshin naqty nátıjeler ákeledi, — dedi Qanat Bozymbaev.
Otyrys aıasynda Qanat Bozymbaev Tájikstan men Ózbekstannyń sý sharýashylyǵy vedomstvolary basshylarymen ekijaqty kezdesýler ótkizdi. Kezdesýlerde Syrdarııa jáne Ámýdarııa ózenderi basseınderi boıynsha bekitilgen sý lımıtteri men sý qoımalarynyń jumys rejımderin paıdalaný máseleleri talqylanyp, kelesi jylǵy vegetatsııalyq kezeńge daıyndyq is-sharalarynyń jospary aıqyndaldy.
Otyrys qorytyndysy boıynsha Memleketaralyq úılestirý sý sharýashylyǵy komıssııasynyń 90-shy otyrysynyń hattamasyna qol qoıý rásimi ótti. Kelesi otyrys Túrikmenstanda ótedi.